Qazaqstanda «modeldik zaýyttar» qurylady

ASTANA. QazAqparat - Tsıfrly dáýirge beıimdelý baǵytynda «modeldik zaýyttardyń» qurylatynyn Prezıdent Joldaýyn talqylaýǵa arnalǵan QR Úkimetiniń keńeıtilgen otyrysynda Investıtsııalar jáne damý mınıstri Jeńis Qasymbek aıtyp berdi, dep habarlaıdy QazAqparat tilshisi.

Jeńis Qasymbek QR Úkimetiniń keńeıtilgen otyrysynda ekonomıkaǵa qosylǵan qundy odan ári ulǵaıtý, eksportqa baǵyttalǵan óndiristik protsesterdi arttyrý, adam áleýetin jáne ómir súrý sapasyn jaqsartyp, aımaqtyq jáne jahandyq turǵyda el ekonomıkasynyń ıntegratsııalanýy jaıly baıandady.

Indýstrııalandyrý jumysyn jandandyrý úshin qysqa jáne uzaq merzimdi jańa tásilder jasaldy. Taýarlardyń shyǵarylǵan qorjynyn odan ári «kúrdelendirý» jáne syrtqy naryqtarǵa shyǵý aýqymyn keńeıtý basty basymdyq bolmaq. Ónerkásipti «tsıfrlyq dáýirge» daıyndaý úshin qajetti ınfraqurylym men standarttar, «modeldik zaýyttar» qurylady. Ónerkásipti tsıfrlandyrý bizdiń kásiporyndardyń ónimdiligi men básekege qabilettiliginiń negizgi quraýshylarynyń biri bolady. Sondaı-aq, eksporttaýshylarǵa keshendi qarjylyq jáne jalpylaı qoldaý kórsetý isi nyǵaıady. Aldaǵy úsh jylda bul maqsatqa 500 mlrd teńge bólinedi.

Aıta ketsek, keshe Úkimet úıinde QR Premer-Mınıstri B. Saǵyntaevtyń tóraǵalyǵymen Prezıdent Ákimshiliginiń basshysy Á. Isekeshevtiń qatysýymen Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Qazaqstan halqyna arnaǵan Joldaýynda atalǵan tapsyrmalardy oryndaý máseleleri boıynsha QR Úkimetiniń keńeıtilgen otyrysy ótken bolatyn.