Qazaqstanda mobıldi qoǵam qalyptastyrý qajet - saıasattanýshy Qalıev
Onyń aıtýynsha, ýrbanızatsııany toqtatý múmkin emes. Onsyz básekelestik tómendeıdi, ekonomıkalyq ósim tejeledi, dep habarlaıdy QazAqparat tilshisi.
«Ýrbanızatsııa- bul tabıǵı úderis. Ony toqtata almaısyń. Sosyn básekelestik degen másele taǵy bar. Adam qalada bilim alǵannan keıin jumys tappasa, birden aýylǵa kóshe salmaıdy ǵoı. Onyń boıynda alǵyrlyq bolsa, ol ózine qajetti jumysty basqa qaladan taba alady. Jalpy, adam bir jerge baılanbaýy qajet. Áıtpese, ol bir jerdep otyryp, «jumys joq» dep qol qýsyryp otyra beredi. Ondaı psıhologııadan qutylý qajet. Sanany jańǵyrtýdyń birden-bir maqsaty da sol. Jalpy, halyq mobıldi, ıaǵnı bir-birimen aralas-quralas bolǵan saıyn, onyń yntymaq-birligi de artady. Al, eń bastysy, qoǵam kádimgideı tiri ári belsendi organızmge aınalady»,- dedi Qalıev QazAqparat tilshisine bergen suhbatynda.
Aıta keteıik,«Aýyl» partııasynyń tóraǵasy, senator Álı Bektaev "Týǵan jer" baǵdarlamasy arqyly ýrbanızatsııany toqtatýdy usynyp otyr. "Ýrbanızatsııaǵa kóp adam tabıǵı nárse retinde qaraıdy.Negizinde, biz ýrbanızatsııa degendi toqtatýymyz qajet. Meniń eń úlken úmitim,osy baǵdarlama aýyldyń turmys-tirshiligin jaqsartyp, el sol jerden kóshpeıtindeı jaǵdaı týǵyzady dep oılaımyn. Olaı bolsa, biz sol aýyldyń turǵyndaryna jaǵdaı jasaýymyz qajet, aýylda eńbek etetin jaǵdaı jasaýymyz qajet, aýylda jaqsy bilim alatyn múmkindik berýimiz kerek. Prezıdent usynǵan baǵdarlamanyń túpki maqsaty osy bolady dep oılaımyn", - dedi Bektaev búgin efırge shyqqan "1 stýdııa" baǵdarlamasynda .