Qazaqstanda mindetti ekologııalyq tólemderdi kásiporyndardyń ózine qaldyrý usynyldy

ASTANA. QazAqparat - Qazaqstandaǵy kásiporyndar óteıtin mindetti ekologııalyq tólemderdi kásiporyndardyń ózine qaldyrý qajet. Sol aqshaǵa olar ekologııaǵa zalal keltirmeıtin tıgizbeıtin qurylystardy sala alady. Osyndaı oıdy búgin Úkimet úıinde Taý-ken óndirisi men metallýrgııa kásiporyndarynyń respýblıkalyq qaýymdastyǵynyń Atqarýshy dırektory Nıkolaı Radostovets bildirdi, dep habarlaıdy «QazAqparat» HAA tilshisi.

«Qalalarda ekologııalyq jaǵynan aıtarlyqtaı ózgeris joq. Ekinshi jaǵynan biz kásiporyndardyń óndiristik kólemin arttyrǵanyn baıqap otyrmyz. Qaı jaǵdaıda da qalalardyń ekologııalyq lastanýy tómendeıtin emes. Al osy máselede bir jaǵdaıǵa nazar aýdarǵan jón. Kásiporyndar ekologııalyq qajettilikter úshin memleketke aqsha tólemeı me!? Mysaly, Temirtaýda qara tústi qar jaýdy.  Biraq máseleniń anyq-qanyǵyna kóz jetkizgen kezde iri kásiporyndar men ákimdikterdiń ózara birlesken júıesine nazar aýdarǵan jón. Sebebi, ákimdikter iri kásiporyndardan qomaqty ekologııalyq tólemder alady. Olar ondaǵan mlrd teńgege jetedi. Alaıda ákimdikter ol qarjyny ekologııalyq maqsatta jumsamaıdy», - dep málimdedi Nıkolaı Radostovets.

Onyń aıtýynsha, Qaraǵandy oblysynda kásiporyndardan túsken ekologııalyq tólemder men aıyppuldardyń tek 0,70 paıyzy óńirdegi ekologııalyq jaǵdaıdy jaqsartý úshin jumsalady. Sol sekildi atalǵan túsimniń Qostanaı oblysynda 3 paıyzy, Pavlodar oblysynda 3,2 paıyzy ǵana ekologııalyq maqsatqa baǵyttalǵan.

«Bul oblystar  ekologııalyq jaǵdaıyn jaqsartýy qajet óńirler ekeni daýsyz», - deıdi ol.

Nıkolaı Radostovets ekologııalyq túsimderdi kásiporyndarǵa qaldyrýdy usyndy. Esesine, olarǵa ózderine qarasty nysandarda tazartý qurylystaryn salý usynylmaq. Sonymen birge, Radostovetstiń aıtýynsha, atalǵan qarajatqa qoǵamdyq baqylaý ornatylǵany durys.