Qazaqstanda mıkrokredıtter boıynsha artyq tólemniń shekti mólsheri azaıady

NUR-SULTAN. QazAqparat – QR Ulttyq bankiniń tóraǵasy Erbolat Dosaev shaǵyn nesıelerdiń keıbir túrleri boıynsha artyq tólemniń shekti mólsheri tómendeıtinin aıtty, dep habarlaıdy QazAqparat.

«2020 jylǵy 1 qańtardan bastap barlyq mıkroqarjy uıymdary, onyń ishinde onlaın-kredıtteý kompanııalary, kredıttik seriktestikter, lombardtar jáne halyqqa qaryz beretin basqa da zańdy tulǵalar QR Qarjy naryǵyn retteý jáne damytý agenttiginiń retteý perımetrine engizildi», - dep jazdy Erbolat Dosaev depýtattyq saýalǵa bergen jaýabynda.

Ol Memleket basshysynyń tapsyrmasyna sáıkes, 2021 jylǵy 1 qańtardan bastap mıkroqarjy uıymdary Qarjy naryǵyn retteý jáne damytý agenttiginiń mindetti lıtsenzııalaýynan ótetinin eske saldy.

«Agenttik banktik jáne mıkroqarjy qyzmetin retteý máseleleri jumystaryn júrgizý aıasynda 2021 jylǵy 15 naýryzda jeke tulǵamen 45 kúnge deıingi merzimge jasalǵan mıkrokredıt sharty boıynsha syıaqynyń shekti kórsetkishin 50 AEK-ke deıin tómendetýge baǵyttalǵan zańnamalyq ózgerister engizdi.

Azamattardyń boryshtyq júktemesin odan ári tómendetý maqsatynda Ulttyq bank Qarjy naryǵyn retteý jáne damytý agenttiginiń 45 kúntizbelik kúnge deıingi mıkrokredıt boıynsha artyq tólemniń shekti mólsherin 50 AEK-ten aspaıtyn mólsherde eki ese, ıaǵnı mıkrokredıt shartynyń búkil qoldanylý kezeńinde berilgen mıkrokredıt somasynyń 50%-yna deıin tómendetý jónindegi usynysyn qoldaıdy», - dedi E. Dosaev.