Qazaqstanda meshit qurylysyna qatysty talaptar ózgerýi múmkin

ASTANA. QazAqparat - Qazaqstanda meshit qurylysy kezinde halyq sanyn eskerý tártibi engizilýi múmkin. Bul týraly Senattyń Áleýmettik-mádenı damý jáne ǵylym komıtetiniń keńeıtilgen otyrysynda  QR Qoǵamdyq damý vıtse-mınıstri Berik Aryn málim etti, dep habarlaıdy QazAqparat.

«Meshitterdiń qurylysyna toqtalsaq, bizde tıisti standarttar bar. Biraq jasalǵan usynystar aıasynda bul baǵyttaǵy jumystardy jetildirý talaby bar. Óıtkeni bizde adam sanyna eseptemeı turǵyzyp jatady. Mysaly, bir óńirlerde meshitter men shirkeý joq bolsa, al keıbir jerlerde qaltaly azamattar artyǵymen salyp tastaıdy. Osy baǵytta Túrkııany zerdelegen bolatynbyz. Onda 3 myń adamǵa bir meshit qarastyrylǵan», - dedi Berik Aryn.

Onyń sózine qaraǵanda, bul másele jergilikti atqarý organdarynyń quziretine qarasty bolýy tıis.

«Biraq biz sol standarttardy qaıta qarap jatyrmyz. Kóp meshitterde avtoturaq eskerilmegen. Sonymen qatar, qarjylyq tapshylyq saldarynan qaraýsyz qalǵan meshitter de kezdesedi. Meshit salǵan adam bastapqy kezde 2-3 jyl nysandy kútip ustaý mindetin ózine alýy kerek degen de usynystar boldy. Sodan keıin halyq sanyn da nazarǵa alý qajettigi talqylanýda. Osynyń barlyǵyn eskere otyryp, standarttarǵa ózgerister engizsek degen oıymyz bar», - dep túıdi B. Aryn.

Aıta keteıik, Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy talqylandy. Jobada memlekettik qyzmetshilerdiń din salasyndaǵy ádebine baılanysty birqatar talaptar naqtylanǵan.

Otyrys barysynda Berik Aryn turaqty aılyǵy joq ımamdardyń máselesi sheshý baǵytynda Úkimetke tıisti usynys jasalǵanyn atap ótti. 

Sonymen qatar vıtse-mınıstr dinı baǵyttaǵy balabaqshalardyń jumysy toqtatylǵanyn jetkizdi.