Qazaqstanda memorgandardy tekserý naýqany bastalady

ASTANA. QazAqparat - QR Ulttyq ekonomıka mınıstrligi kásipkerlerdiń quqyqtaryn buzǵan memlekettik organdardy jazalaýdy bastaıdy. Ol úshin arnaıy qoǵamdyq qabyldaýlar ashylady. Oǵan kez kelgen bıznesmen óz aryzyn tapsyra alady, dep xabarlaıdy QazAqparat tilshisi.

Kásipkerlikti damytý departamentiniń dırektory Aslanbek Jaqypovtyń aıtýynsha, búginde mınıstrlikke kásipkerlerdi qoldaý jáne olardyń quqyǵyn qorǵaý quzireti berilgen.

«Bul degenimiz, biz kez kelgen memlekettik organdy teksere alamyz. Birinshiden, kásipkerlerge qatysty memlekettik baqylaýdyń tártibi qalaı atqaryldy, sony tekserýge quziretimiz bar. Máselen, bir memorgan kásipkerlik nysandy tekserse, biz ol tekseristiń qalaı ótkizilgenin zerdeleı alamyz. Qandaı da bir zańbuzýshylyqtar anyqtalǵan jaǵdaıda tıisti sharalar qolǵa alynady. Ekinshiden, ruqsat qaǵazdaryn berý jumysyn tekserýge quqymyz bar. Úshinshiden, memlekettik qoldaý sharalaryn atqarý barysyn baqylaı alamyz. ıAǵnı, ruqsat berý nemese memlekettik qoldaý durys jasalmasa, tıisti sharalar qabyldanady. Búginde dál osy úsh salada kásipkerlerdiń quqyqtary jıi buzylady. Sol sebepti biz atalǵan baǵyttardy tańdadyq», - dedi A.Jaqypov Astanada ótken baspasóz máslıxatynda.

Onyń sózine qaraǵanda, aldaǵy ýaqytta aımaqtarda qoǵamdyq qabyldaýlar ashylady. Sol kezde kez kelgen kásipker óziniń aryz-shaǵymyn tapsyra alady. Sonyń negizinde memlekettik organdarǵa qatysty tekserý sharalary júrgiziledi.

«Biz alǵashqy aımaq retinde Almaty qalasyn tańdadyq. Aǵymdaǵy jyly 20-22 aqpan kúnderi «Nur Otan» partııasynyń Almaty qalalyq fılıalynda qoǵamdyq qabyldaý ashylady. Kásipker kelip, óz aryzyn jazyp kete alady. Sol shaǵymnyń negizinde memlekettik organdarǵa qatysty jospardan tys tekserýler uıymdastyrylady», - dep atap kórsetti A.Jaqypov.

Aıta keteıik, búgin QR Ulttyq ekonomıka mınıstrligi kásipkerlerdi tekserýdiń jańa ádisin túsindirdi.