Qazaqstanda memlekettik bıýdjetti baqylaýdyń jańa tásili engiziledi

<p>ASTANA. KAZINFORM &ndash; Qazaqstanda tsıfrlyq teńgeni engizý jobasyn talqylaý 2021 jyldyń shildesinde bastalǵany belgili. Al, 2023 jyldyń qarashasynda tsıfrlyq teńgeni iske qosý rásimi ótti. Bıyl elimizde memlekettik satyp alý úshin tańbalanǵan quraldar tetigin paıdalaný boıynsha pılottyq jobany júzege asyrý josparlanyp otyr. QR Sybaılas jemqorlyqqa qarsy is-qımyl agenttigi mamandary agenttik tilshisine tsıfrlyq teńgeni tańbalaý týraly tolyǵyraq aıtyp berdi.</p>

Buǵan deıin Qazaqstannyń ulttyq tólem korporatsııasynyń tóraǵasy Bınýr Jalenov tsıfrlyq teńge ulttyq valıýtanyń úshinshi nysany ekenin atap ótken edi. Onyń pikirinshe, ınnovatsııalyq qarjy qyzmetterin qurý úshin blokcheın tehnologııasynyń áleýetin ashyp, memlekettik shyǵystardyń tıimdiligin qamtamasyz etedi. Sondaı-aq, dástúrli qarjy men tsıfrlyq aktıvter álemi arasynda «kópir» bolmaq.

Belgili bolǵandaı, tsıfrlyq teńge tańbalaýyshtar qolma-qol aqshanyń tsıfrlyq analogy túrinde usynylǵan. Ár tańbalaýysh belgili bir mánge ıá. Bıýdjettik shyǵystarǵa bólinetin tsıfrlyq teńgeler sala boıynsha ártúrli túske boıalady eken. Mysaly, mektep salý úshin boıalǵan tsıfrlyq teńge tek mektep salý shyǵyndaryn tóleýge jumsalýǵa tıis.

— «Aqshany tańbalaýdy» iske asyrýmen sybaılas jemqorlyqqa qarsy qyzmettiń, QR Ulttyq bankiniń, Qarjy mınıstrliginiń, Aýyl sharýashylyǵy mınıstrliginiń, jergilikti atqarýshy organdardyń, sondaı-aq memlekettik aqshany qoldana otyryp, ózara esep aıyrysýǵa qatysatyn qarjy ınstıtýttary men kvazımemlekettik uıymdardyń ókilderi aınalysady. Tsıfrlyq teńge platformasyn tikeleı ázirleýmen jáne jetildirýmen QR Ulttyq Bankiniń enshiles uıymy — «Ulttyq tólem korporatsııasy» AQ aınalysady», — delingen Kazinform agenttigi tilshisiniń resmı suraýyna kelgen jaýapta.

Tsıfrlyq teńgeni baqylaý jónindegi arnaıy qyzmetti qurý týraly sheshim memlekettik satyp alý úshin tańbalanǵan quraldar tetigin paıdalaný jónindegi 2024 jylǵy pılottyq jobanyń nátıjelerine súıene otyryp qabyldanady.

Antıkorda aldyn ala talqylaý sheńberinde joǵaryda atalǵan ókilettikterdi memlekettik bıýdjet ákimshilerine berý kózdelip otyrǵany naqtylandy.

QR Sybaılas jemqorlyqqa qarsy is-qımyl agenttigi ókiliniń aıtýynsha, tokenderdi tańbalaý tetigin ázirleýge memlekettik bıýdjetten qarajat bólinbeıdi. QR Ulttyq Banki jobany Ulttyq qarjy ınfraqurylymyn damytý josparyna sáıkes ázirleıdi.

— Memlekettik satyp alýǵa bólingen aqshalaı qarajatty bıýdjettik baǵdarlamanyń ıesi olardyń maqsatty paıdalanylýyn qadaǵalaý úshin belgileıtin bolady. Tsıfrlyq teńge tokenderiniń tańbalanýy olardyń ıesine kórinetin bolady, ıaǵnı tańbalanǵan tsıfrlyq teńgeniń ıesi zańdy tulǵa ózine tıesili qarajattyń tańbalanǵanyn kóredi, — dep túsindirdi Antıkordan.

Qarajatty alýshynyń shotyna túsken kezde belgi avtomatty túrde alynady dep boljanyp otyr.

— Zańdy tulǵalardyń shottaryna esepke alý kezinde tańbalaýdy alyp tastaý sharty máselesi ázirge Ulttyq bankpen, qarjy mınıstrligimen jáne basqa da memlekettik uıymdarmen talqylaý satysynda tur. Aqshany tańbalaý jalaqyny esepteý kezinde, ıaǵnı eńbekaqy tóleý qorynan qarajatty azamattardyń tikeleı tsıfrlyq shottaryna aýdarý kezinde, sondaı-aq taýarlardy, jumystar men kórsetiletin qyzmetterdi (tikeleı óndirýshilerge, ımporttaýshylarǵa, saýda uıymdaryna jáne t. b.) tóleý úshin túpkilikti óndirýshilerge jáne ózge de sýbektilerge qarajatty esepteý kezinde alynady deýge bolady, — deıdi Antıkor basshylyǵy.

Esterińizge sala keteıik, tolyqqandy fýnktsıonaly bar tsıfrlyq teńgeni ónerkásiptik paıdalanýǵa engizý 2025 jylǵa josparlanyp otyr.