Qazaqstanda memlekettiń laýazymdy qyzmetterinen úmitti áıelder qarasy kóp

ASTANA. QazAqparat - Búgin QR Memlekettik hatshysy Gúlshara Ábdiqalyqovanyń tóraǵalyǵymen Prezıdent janyndaǵy  Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti, dep habarlaıdy QazAqparat.

«Aǵymdaǵy jyl el esinde erekshe  qalary belgili. Óıtkeni, Elbasy Nursultan Nazarbaev ekonomıkalyq, saıası jáne rýhanı jańǵyrý baǵyttarynda úlken reformalardy bastap berdi. Sonymen qatar memleketimizde úlken  is-shara - ol EKSPO-2017 halyqaralyq mamandandyrylǵan kórmesi ótti. Bul kórme aıasynda «Áıelder bolashaq energııany qoldaıdy»  atty úlken forým boldy. Oǵan barlyq komıssııa músheleri qatysty. Sol forýmǵa qatysý úshin 25 elden 300-den astam áıel keldi.  Sharaǵa atsalysqan sizderge alǵysymdy  bildirgim keledi», - dedi otyrysty ashqan Memlekettik hatshy.

Sonymen qatar Gúlshara Ábdiqalyqova elimizdegi áıelder qaýymyn «Rýhanı jańǵyrý» jalpyulttyq jobasynyń 6 baǵytyn ilgeriletý úshin barynsha kúsh jumyldyrýǵa shaqyrdy.

Otyrys barysynda Qazaqstan Respýblıkasyndaǵy BUU-nyń 2030 jylǵa deıingi ornyqty damý maqsattaryna qol jetkizý baǵytynda atqarylǵan jumystar týraly QR Syrtqy ister mınıstrliginiń aqparaty tyńdaldy. Sondaı-aq memlekettik qyzmetti jańǵyrtý jáne mansap turǵysynan ilgeriletý barysynda teń múmkindikterdi qamtamasyz etý týraly másele de qaraldy.

Memlekettik qyzmet isteri jáne jemqorlyqqa qarsy is-qımyl agenttiginiń aqparatyna sáıkes, 2017 jyldyń 1 qańtaryndaǵy jaǵdaı boıynsha elimizdegi memlekettik qyzmetkerlerdiń arasynda áıelderdiń úlesi 55,5 paıyzdy qurap, ótken jylǵy kórsetkishten 0,5 paıyzǵa artqan.  Jalpy ótken jyly «B» korpýsyndaǵy ákimshilik laýazymdardy ıelenýge arnalǵan konkýrstarǵa 43476 kandıdat qatyssa, sonyń 20862-sin áıelder quraǵan. Konkýrs nátıjesinde taǵaıyndalǵan qyzmetkerlerdiń 48,5 paıyzyn áıelder qurady.

Jıyn sońynda  Memlekettik hatshy memlekettik organdarǵa birqatar naqty tapsyrma berdi.