Qazaqstanda memlekettik satyp alýlar ortalyqtandyrylyp júrgizilmek
Osy oraıda QR Qarjy mınıstrligi Memlekettik satyp alý zańnamasy departamentiniń dırektory Sábıt Ahmetov qandaı maqsattar úshin túzetýler josparlanyp otyrǵandyǵyn baıandap berdi.
«Onda negizgi 3 jaǵdaı eskerilgen. Birinshiden, ol barlyq memlekettik satyp alýlardy ortalyqtandyrýǵa qatysty. Qazirgi kezde bul sharalardy árqaısysy ózi úshin júrgizýde. Bul rette mektep ózi úshin, aýrýhana da bólek ótkizýde. Endi biz bul sharalardy jekeleı júrgizbeý úshin, birtektes taýarlar boıynsha satyp alýlardy biriktirýge nıettimiz. Máselen, árbir mektep kómir satyp alatyny belgili. Osy turǵyda barlyǵy bólek alǵan kezde baǵa da basqasha qalyptasady. Al eger osynyń barlyǵyn tutas aýdanǵa bir jetkizýshiden alsaq, onda sáıkesinshe ónimniń baǵasy men sapasyna tıisti deńgeıde yqpal etip, utýǵa bolady», - deıdi ol.
Onyń atap ótýinshe, ortalyqtandyrý naqty taýarlar boıynsha júrgiziledi.
«Ortalyqtandyrý aıasynda barlyq satyp alýlar osy júıege enedi degendi bildirmeıdi. Satyp alýlar naqty taýarlar men qyzmetter tizimi turǵysynda ortalyqtandyrylady. ıAǵnı, bul standartty taýarlarǵa qatysty. Osy oraıda qaǵaz, keńese taýarlary, qyzmettik avtokólik, jıhaz qamtylmaq. Atap aıtqanda, osy standartty barlyq taýarlardy biriktirip, jetkizý oryndaryna bólýge bolady. Bul turǵyda bir lot pen bir jetkizýshi qarastyrylady»,-deıdi departament basshysy.
Qarjy mınıstrligi ókiliniń sózinshe, ekinshi másele - ol kvazımemlekettik sektordyń satyp alýlaryn zańnamalyq retteýge baılanysty.
«Bul sharalar ulttyq kompanııalar men holdıngterge tıesili. Búginde olar ózderiniń erejesimen satyp alady, árqaısysy ózderiniń erejesin bekitip, satyp alýlardy iske asyrady. Qazirgi kezde bul zań jobasymen olar úshin biryńǵaı erejeni bekitip, osy talaptarmen satyp alýlardy júrgizý usynylýda. Osy oraıda baqylaý da biryńǵaı bolady, ıaǵnı memlekettik qadaǵalaý eskerilgen. Búginde olar jeke ózderin tekseredi, sáıkesinshe tıisti bir jaǵdaılardy eskermeı ketýi múmkin. Nátıjesinde, jetkizýshiler shaǵymdary túsip jatady»,-deıdi Sábıt Ahmetov.
Munymen qosa, úshinshi jaǵdaı memlekettik satyp alýlar zańnamasyn jetildirýge qatysty bolyp otyr.
«Ózderińiz bilesizder, bizde bir jarym jyl boıy jańa zańnamamen jumys istelýde, bul qujat 2016 jyldyń 1 qańtarynda kúshine engen edi. Osy baǵyttaǵy jumystardyń barysynda keıbir qadamdardy jaqsartý kerektigi baıqaldy. Qazirgi kezde zań jobasy memlekettik organdarmen kelisý kezeńinde. Jaqyn arady qujatty Úkimettiń qaraýyna engizbekpiz. Úkimet jáne QR Prezıdenti Ákimshiligimen kelisilgennen keıin, ony Parlament Májilisine engizemiz. Parlamentte zań jobasy kem degende jarty jyl qaralady, sondyqtan da atalǵan qujat 2018 jyldyń ekinshi jartyjyldyǵynda qabyldanady dep esepteımiz», - dedi S. Ahmetov.