Qazaqstanda memlekettik qyzmetshiler qansha saǵat artyq jumys isteıdi
«Memlekettik organdardaǵy artyq jumys ýaqytyna qatysty aıtar bolsam, negizinen bul másele memlekettik organdardyń qyzmetin baǵalaýdyń máni sanalady. Iá, memlekettik qyzmette artyq jumys isteý bar. Biraq, bul jappaı sıpatqa ıe qubylys dep aıtýǵa bolmaıdy. Eger memlekettik organdardyń ákimshilik ǵımarattaryna qyzmetshilerdiń kirýin baqylaý júıesin zerdeleý arqyly alynǵan resmı málimetterge kóz júgirter bolsaq, onda artyq jumys isteý ortasha 1 saǵat 19 mınýtty quraıdy. Bul rette qyzmetshilerdiń belgili bir shuǵyl tapsyrmalar bolǵan jaǵdaıda jıi bógeletindigi belgili. Sondyqtan bul kúndelikti oryn alatyn jaıt dep aıtý shyndyqqa janaspas edi», - dedi Úkimet úıinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaımova.
Onyń aıtýynsha, Qazaqstanda memlekettik qyzmetke laıyqty kadrlardy tartý úshin barlyq jaǵdaı jasalǵan.
«Muny biz júrgizgen saýalnama nátıjesi de rastap otyr. Oǵan sáıkes qyzmetshilerdiń 70 protsenti búginde memlekettik qyzmetke daryndy ári bilikti kadrlar keledi dep sanaıdy», - dedi ol.