Qazaqstanda memlekettik deńgeıde ınklıýzıvti bilim berý júıesin engizetin ýaqyt jetti - L. Qaltaeva
Bul týraly búgin Almatyda «Azamattyq qoǵamnyń tıimdi basqarýǵa qoldaý kórsetýi: tájirıbeler men tásilder» taqyrybynda ótip jatqan óńirlik konferentsııa barysynda «Shyraq» múgedek áıelder qaýymdastyǵynyń tóraıymy jáne Ortalyq Azııalyq múgedek adamdar forýmynyń tóraıymy Lázzat Qaltaeva málim etti.
Onyń aıtýynsha, Qazaqstanda eń aldymen ǵylymı negizde ınklıýzıvti bilim berý júıesimen jumys isteıtin birneshe modeldik mektepter qurý qajet.
«Mundaı mektepterde múgedek balalar da múgedek emes balalar da birge oqıdy. Mundaı orta, múgedek balalardyń qoǵamǵa erte bastan sińisip ketýine jol ashady. Óıtkeni, balalar múmkindigi shekteýli qurbylaryn ózderine teń dárejede óte tez qabyldaıdy. Al eresekterdiń múgedekterge degen kózqarasyn ózgertý óte qıyn. Mysaly, múgedektigińe qaramastan qansha jerden daryndy, talantty qyzmetker bolyp tursań da olar seni báribir múgedek retinde qabyldaıdy. Mundaı kózqaras bolmas úshin, múgedekterdiń erte bastan qoǵamǵa sińisip ketýlerine jaǵdaı jasaý kerek», - dedi L. Qaltaeva.
Bul jerde ol múmkindigi shekteýli jandardyń da ózderine degen kózqarasyn ózgertý kerektigin alǵa tartty.
«Múmkindigi shekteýli jandar da ózderine degen óz kózqarastaryn ózgertýi kerek. Olardyń arasynda ózin-ózi kemsitýshilik, ózin jek kórýshilik oryn alatyny jasyryn emes. «Men endi eshteńege jaramaımyn, eshkimge kerek emespin», - dep kúıinetinder de bar. Sondyqtan, birinshi kezekte múmkindigi shekteýli jandar aldymen ózderine qatysty óz kózarastaryn túzep alsyn. Sonda qoǵamnyń da olarǵa degen kózqarasy ózgeredi», - dedi L. Qaltaeva.
Qazaqstandaǵy Ortalyq Azııanyń Eýrazııa qory uıymdastyrǵan búgingi sharaǵa AQSh-tyń Halyqaralyq damý boıynsha agenttigi (USAID) qoldaý kórsetýde.
Oǵan QR Mádenıet jáne sport mınıstrligi, BUU baǵdarlamalarynyń Qazaqstandaǵy jáne Tájikstandaǵy ókilderi, úkimettik emes uıymdardyń basshylary jáne basqa da tulǵalar qatysýda.
Konferentsııa erteń óz jumysyn jalǵastyrady.