Qazaqstanda memlekettik áleýmettik tapsyrystardyń salalyq baǵytyn keńeıtý josparlanýda

ASTANA. QazAqparat - Qazaqstanda memlekettik áleýmettik tapsyrystardyń salalyq baǵytyn keńeıtý josparlanýda. Bul týraly QR Din isteri jáne azamattyq qoǵam mınıstri Abzal Núkenov «QazMedıaOrtalyqta» ótken QR Prezıdenti janyndaǵy Ortalyq kommýnıkatsııalar qyzmetiniń brıfınginde aıtty, dep habarlady «QazAqparat» HAA tilshisi.

«7-shi Qazaqstannyń azamattyq forýmyndaǵy usynystardy júzege asyrý boıynsha is-shara jospary jobasynda memlekettik organdar men azamattyq qoǵamnyń tıimdi qarym-qatynasynyń negizgi mindettemeleri men maqsattary qarastyryldy. Aldaǵy úsh jylda mınıstrliktiń aldyna mynadaı mindettemeler qoıylǵan: memlekettik áleýmettik tapsyrystar men memlekettik granttar aıasynda qoǵamdyq baqylaýdy kommertsııalyq emes uıymdarmen birlesip damytý, memlekettik áleýmettik tapsyrystar men granttardyń salalyq baǵytyn keńeıtip, qarjylandyrylýyn ulǵaıtý, ÚEU sektorynyń básekege qabiletti orta men ózin-ózi retteıtin uıymdardyń memlekettik fýnktsııalardy berýge daıyndyq taldaýyn jasaý, eldiń áleýmettik-ekonomıkalyq damýynda ÚEU úles esebi boıynsha ádisteme jobasyn daıyndaý. Alda jergilikti qaýymdastyq qajettilikterin baǵalaý ádistemesin ázirleý jáne engizý, qoǵamdyq keńester qyzmetin jetildirý aıasyndaǵy jumystar, Qazaqstan Respýblıkasynda eriktiler jumysyn damytý boıynsha zań negizderin jasaý mindetteri tur», - dedi Núkenov.

Vıtse-mınıstr Qazaqstanda eriktiler qozǵalysy keńinen tanylǵanyn jáne bul qozǵalystyń mártebesin zańmen belgileý kerektigin atap ótti.