Qazaqstanda memleket pen din baılanysynyń jańa modeli qalyptaspaq
Jańa model din salasyndaǵy memlekettik saıasattyń 2017-2020 jyldarǵa arnalǵan tujyrymdamasyna negizdelgen, dep xabarlaıdy QazAqparat tilshisi.
QR Din isteri jáne azamattyq qoǵam mınıstri Nurlan Ermekbaevtyń aıtýynsha, qoǵamnyń sanasyn jańǵyrtý salasyndaǵy mınıstrliktiń basymdy baǵyttarynyń biri - memleket pen din arasyndaǵy yntymaqtastyqtyń ózindik modelin qalyptastyrý.
"Bizdiń model ulttyq dástúrlerge, zamanaýı shynaıylyqqa, dinı qaǵıdalardyń tek meıirimdilik pen adamgershilik sııaqty qundylyqtaryna negizdelýi abzal. Jańa modeldi ázirleýdiń arqasynda din zańnamany júıeli túrde jetildirýge bolady", - dedi Ermekbaev búgin mınıstrliktiń alqa májilisinde.
Mınıstrdiń sózine qaraǵanda, jańa model Qazaqstannyń din salasyndaǵy memlekettik saıasatynyń 2017-2020 jyldarǵa arnalǵan tujyrymdamasyna negizdeledi. Atalǵan qujat sarapshylardyń talqylaýynan ótti.
"Ol dástúrli rýxanı qundylyqtarǵa, evolıýtsııalyq damýǵa, zaıyrly memleket qaǵıdalaryna negizdelgen programmatıkalyq mádenıetti, ulttyq biregeılikti nyǵaıtýdy kózdeıdi. Tujyrymdama aıasynda dinı konservatızm men ekstremızmge qarsy qoǵamnyń ımmýnıtetin qalyptastyratyn naqty sharalardy uıymdastyrý qarastyrylǵan. Qujattyń jobasy qoǵamdyq talqylaýdan jáne memlekettik organdarmen kelisýden ótti. Jýyrda biz ony Úkimetke engizemiz", - dep atap kórsetti Ermekbaev.