Qazaqstanda mektep ashanalaryn monıtorıngileý jobasy bastaldy
Quramyna ata-analar, «Nur Otan» partııasy aımaqtyq fılıaldarynyń ókilderi, BAQ, ÚEQ men memlekettik organdardyń ókilderi kiretin vedomstvoaralyq saraptamalyq top (VST) músheleri tamaqtanýdyń mekteptegi núktelerine monıtorıngti júzege asyrdy. Alǵashqy kúni partııalyqtar men ata-analar komıteti júzdegen mekteptegi tamaqtaný núktelerine ınspektsııa júrgizdi. Sol kezde birtıpti ondaǵan olqylyqtar anyqtaldy.
«Elimizdiń mektepterinde eń aldymen tamaqtaný sapasyn kún saıyn baqylaýǵa jáne olqylyqtardy anyqtap otyrýǵa mindetti mekteptiń sarapshylyq komıssııasynyń eseptik qujattamasy men belsendiligi tekserildi. Anyq bolǵandaı, kóptegen mektepterde olar jumys istemeıdi - eskertýi bar birde-bir hattama nemese olqylyqtardy joıý boıynsha birde-bir akt anyqtalmady. Al Shymkenttegi mektepterdiń birinde komıssııa tutastaı oqý mekemesiniń qyzmetkerlerinen turady - mektep ashanasyn baqylaýǵa tek bir ata-anaǵa ǵana ruqsat berilgen», - delingen habarlamada.
Partııalyq vedomstvoaralyq saraptamalyq top mektep ákimshiliginiń kezekshilik kestesiniń bolýyna tekserildi, oqýshylardyń tamaqtaný tártibi, sý ishý tártibiniń saqtalýy, qol jýýǵa arnalǵan jaǵdaı jasalý, bekitilgen mázirdiń bolýy, sondaı-aq, mektep ashanasy ratsıonynyń biryńǵaı standarttarǵa sáıkestigi ınspektsııalandy. Montorıngileýdiń qorytyndysy boıynsha nusqaýlyqtar men esepter rásimdeldi. Mysaly, VST quramyna kiretin ata-analar mektep dırektoryna: mázirdi únemi ǵalamtorda jarııalap turý, taǵam bloktaryna kameralar ornatý, belgili jýrnalıster men blogerlerdi sarapshylyq komıssııasyna qosý syndy usynystaryn alǵa tartty.
«Mektep ashanalary» partııalyq jobasy merzimsiz bolyp tabylady, sondyqtan monıtorıngileý jalǵasyn tabady, ol jıi jáne únemi kútpegen jerden júrgiziledi.
«Ótken jyly «Nur Otan» partııasy tamaqtaný salasyndaǵy kúrdeli problemalardy sheshý jáne ata-analar komıtetiniń, ashanany jalǵa alýshylardyń, mektep ákimdigi men bilim berý basqarmasynyń áreketterin úılestirý úshin «Mektep ashanalary» jobasyn ázirledi. Búgingi tańda mektep jasyndaǵy balalar arasynda as qorytý aǵzalarynyń aýrýlary jıilep ketkendikten ol osy problemanyń sheshimine aınalýy tıis», - dedi «Nur Otan» partııasynyń hatshysy Ilıa Terenchenko.
Onyń aıtýynsha, ótken jyly partııa mektep ashanalarynda tyıym salynǵan tamaqtar tizimin keńeıtýge qol jetkizgen bolatyn. Shujyqsha, shujyq ónimderi, gambýrgerler, sondaı-aq, jasandy boıaǵyshtary, hosh ıistendirgishter, dámdi kúsheıtkishter men táttilendirgishterge tyıym salynǵan. 2018 jyly jeltoqsanda Densaýlyq mınıstrligi osyndaı ónimderdiń jańartylǵan tizimin jarııalady.
«Alaıda bul tek alǵashqy qadam ǵana bolatyn. Ári qaraı osy normalar men talaptardyń saqtalýyn qamtamasyz etý mańyzdy. Sondyqtan bizdiń ekinshi mindetimiz - elimizdiń barlyq aımaqtarynda monıtorıngileýdiń senimdi júıesin uıymdastyrý», - dedi Ilıa Terenchenko.