Qazaqstanda medavıatsııa COVID-19-ǵa qarsy kúres aıasynda 249 ret shuǵyl shaqyrtýǵa shyqqan

ALMATY. QazAqparat - Qazaqstanda medıtsınalyq avıatsııa qyzmeti on jyldan beri jumys isteıdi, osy ýaqyt ishinde áýe kemeleri 20 161 ret ushqan.

Bul týraly QR Densaýlyq saqtaý mınıstrliginiń Ulttyq shuǵyl medıtsınany úılestirý ortalyǵy medıtsınalyq blogynyń meńgerýshisi Nazıgúl Yrymbaeva Almaty óńirlik kommýnıkatsııalar qyzmetiniń brıfınginde aıtty, dep habarlaıdy QazAqparat tilshisi.

Qazirgi kezde avıatsııa qyzmeti barlyq oblys ortalyqtarynda ornalasqan 24 ushaq pen 13 tikushaqty paıdalanady. Olardyń barlyǵy QR Azamattyq avıatsııa komıtetinde sertıfıkattalǵan.

N. Yrymbaeva atap ótkendeı, árbir ushý – qutqarylǵan ómir. Medıtsınalyq avıatsııa baǵyttyń kúrdeliligine qaramastan, kómekke muqtaj jandarǵa der kezinde jetedi. Barlyq ushaqtar men tikushaqtar joǵary tehnologııalyq zamanaýı medıtsınalyq jabdyqtarmen tolyq jabdyqtalǵan, bul patsıentterge neǵurlym yńǵaıly, qaýipsiz jáne barynsha jyldam medıtsınalyq kómek kórsetýge yqpal etedi.

«2011 jyldan bastap 2021 jyldyń qyrkúıegine deıingi barlyq qyzmet kezeńinde medıtsınalyq avıatsııa jelisi boıynsha oryndalǵan ushýlar sany 20 161-di qurady. Ushý sany jyl saıyn artyp keledi. Avıatsııanyń arqasynda bizge qajetti jerge avtokólikten eki nemese úsh ese jyldam jetý múmkindigi paıda boldy», - dep atap ótti N. Yrymbaeva.

Medavıatsııa 35 operatsııa, donorlyq organdardy alý jáne tasymaldaý úshin 75 ushý júzege asyrdy.

Aıta ketý kerek, el ishindegi shaqyrýlardan basqa, dárigerler QR azamattary men shetelde qıyn jaǵdaıdaǵy qandastardy halyqaralyq tasymaldaýdy da júzege asyrady. Búkil kezeń ishinde álemniń 24 eline 90 ushý oryndaldy.

N. Yrymbaeva jyl saıyn respýblıkada medavıatsııaǵa shaqyrýlar sany birtindep artyp kele jatqanyn habarlady. Bul atalǵan qyzmet túrinen habardar halyq sanynyń artqanyn kórsetedi.

2011 jyldan bastap qazirgi ýaqytqa deıin 26 576 patsıentke medıtsınalyq kómek kórsetildi.

N. Yrymbaevanyń aıtýynsha, pandemııaǵa baılanysty medavıatsııa brıgadalary koronavırýspen aýyratyn naýqastardy tasymaldaýǵa daıyn.

«Áýe kemeleriniń bortynda biz patsıentterdiń de, medıtsına qyzmetkerleriniń de ınfektsııalyq qaýipsizdigin qamtamasyz etemiz. COVID-19 vırýsy bar patsıentterdi tasymaldaǵannan keıin áýe jáne jerústi kóligin sanıtarlyq óńdeýge erekshe kóńil bólinedi», - dedi spıker.

Medıtsınalyq avıatsııa qyzmeti COVID-19 koronavırýs ınfektsııasymen kúres aıasynda 2020 jylǵy naýryzdan bastap jáne 2021 jylǵy 9 aıda 249 ushýdy júzege asyrdy, 1160 patsıentke kómek kórsetti.

Sózin qorytyndylaı kele, N. Yrymbaeva Sıtýatsııalyq ortalyqtyń táýlik boıy jumys istep jatqanyn, onyń mamandary saraptamalyq toppen birlesip, turaqty negizde anestezıologııa, reanımatsııa jáne qarqyndy terapııa bólimshesindegi pnevmonııanyń aýyr túrimen aýyratyn jaǵdaıy aýyr patsıentterge kúndelikti monıtorıng jáne taldaý júrgizetinin habarlady. Jyl basynan medıtsına mamandary mundaı patsıentter úshin 182 872 keńes ótkizdi.