Qazaqstanda maýsym aıynda 4 tsentnerge jýyq esirtki tárkilendi

NUR-SULTAN. QazAqparat – «Qarasora-2022» jedel aldyn alý is-sharasy bastalǵannan beri el aýmaǵynda esirtkige qatysty 138 qylmys ashyldy. Bul týraly QR Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Qazaqstanda keń aýqymdy «Qarasora-2022» jedel-aldyn alý is-sharasy jalǵasyp jatyr. Operatsııany Іshki ister mınıstrligi jyl saıyn 1 maýsymnan 30 qazanǵa deıin ótkizedi. Operatsııa bastalǵannan beri esirtki qylmysynyń 138 faktisi anyqtaldy. Onyń ishinde 62-si – esirtki ótkizý, 15-i – asa iri mólsherde esirtki zattaryn saqtaý, 43-i – quramynda esirtki bar tyıym salynǵan ósimdikterdi ósirý jáne 10-y esirtki kontrabandasymen baılanysty «, - dedi Shuǵyla Turlybek mınıstrliktiń baspasóz alańynda ótken brıfıng barysynda.

Mınıstrlik ókiliniń dereginshe, zańsyz aınalymnan 383 keli esirtki zaty tárkilendi. Máselen, Qaraǵandy oblysynyń polıtsııa qyzmetkerleri Jambyl oblysynan esirtki zattaryn jetkizý arnasyn joıdy. Qylmystyq toptyń 5 qatysýshysy ustalyp, ýaqytsha ustaý ızolıatoryna qamaldy. Zańsyz aınalymnan 200 keli marıhýana tárkilendi.

«Túrkistan oblysynda jedel is-sharalar ótkizý barysynda Saryaǵash aýdanynda 1 870 dana apıyn kóknárin zańsyz ósirý faktisi anyqtaldy. Al Qyzylorda oblysynyń polıtsııasy 1 149 túp sora zańsyz ósirilgen esirtki plantatsııasyn anyqtady. Sol jerde esirtkini zańsyz saqtaǵany jáne ósirgeni úshin buryn birneshe ret sottalǵan 50 jastaǵy jergilikti turǵyn ustaldy», - dedi Shuǵyla Turlybek.