Qazaqstanda materıaldyq emes mádenı murany zertteý ınstıtýtyn qurý usynyldy

<p>ASTANA. KAZINFORM &ndash; Elimizde materıaldyq mádenıetke jatpaıtyn rýhanı muralar men qundylyqtardy zertteıtin mekeme qurý usynyldy. Bul týraly Májilis depýtaty, Áleýmettik-mádenı damý komıtetiniń tóraǵasy Ashat Aımaǵambetov málim etti.</p>

«Ózindik ereksheligimizdi saqtap qalýda, urpaqtar baılanysynda, jahandaný zamanynda ulttyq qundylyqtardy saqtap qalýdyń birden bir joly – materıaldyq emes mádenı muramyzdy qorǵaý. Sondyqtan rýhanı muralarymyzdy saqtap, ilgeriletý baǵytyndaǵy usynystaryńyzdy kútemiz. Bul bir ǵana jıyn ótkizip, kete beretin másele emes. Sol sııaqty sizderdi zań jobasymen aınalysyp, birlesip jumys isteýge shaqyramyz. Arnaıy ınstıtýt kerek dep jatyr, meniń oıymsha ǵylymı-zertteý ortalyq mindetti túrde kerek. Zańdy tulǵa, uıym aınalyspasa, nátıje bolady dep aıtý qıyn», - dedi Ashat Aımaǵambetov dóńgelek ústel barysynda. 

Odan bólek, komıtet tóraǵasy el aýmaǵynda materıaldyq emes mádenı murany zertteý ekspedıtsııalar uıymdastyrý kerektigin aıtty.

«Zertteýler júrgizý qajet, sondyqtan Ǵylym jáne joǵary bilim mınıstrligi bul maqsatqa arnaıy qarajat qarastyrýy kerek. Sosyn bar muraǵatty tsıfrlandyrýdy mindetti túrde qamtımyz. Sonymen qatar jyl saıyn aqsha surap júrmeıtindeı, ıaǵnı bıýdjetke qarap otyrmaı zańmen naqty belgilenip qoıǵan qarajat kózi bolsa», - deıdi halyq qalaýlysy.

Aıta ketsek, Májilistiń Áleýmettik-mádenı damý komıtetinde «Materıaldyq emes mádenı murany qorǵaýdy zańnamalyq qamtamasyz etý týraly» taqyrybynda dóńgelek ústel ótti.

Sondaı-aq shara barysynda Májilis depýtaty Erbolat Satybaldın ulttyq salt-dástúr men ádet-ǵurypty ustanýdy nasıhattaýshylardyń mártebesin anyqtaý máselesin kóterdi.