Qazaqstanda mashına jasaý salasynda 8 ındýstrııalyq joba iske qosyldy
dep habarlady QR Indýstrııa jáne jańa tehnologııalar mınıstrligi Pm.kz saıtyna.
«Údemeli ındýstrıaldy-ınnovatsııalyq damý baǵdarlamasynyń aıasynda ІІ jartyjyldyqta 162 ındýstrııalyq jobany iske qosý qarastyrylǵan, onyń segizi - mashına jasaý salasynyń jobasy. Atap aıtqanda, Almaty oblysyndaǵy qorǵasyn-qyshqyldy akkýmýlıator batareıasyn shyǵarý jobasy. Aıta ketý kerek, Qazaqstanda buryn-sońdy mundaı ónim óndirilmegen. Bul jobaǵa salynǵan ınvestıtsııa kólemi 570 mln. teńgeni qurap otyr», - delingen vedomstvo habarlamasynda.
«Kezekti joba - Shyǵys Qazaqstandaǵy «Shyǵysmashzaýyt» AQ aýmaǵynda qolǵa alynyp jatqan vagon jabdyqtaryna arnalǵan shoıyn quımalary tsehy. 6 391 mln. teńge ınvestıtsııa salynǵan bul joba 456 jumys ornyn ashýǵa múmkindik berip otyr».
Sondaı-aq Astanada jolaýshylar vagonyn shyǵaratyn zaýyt iske qosyldy. Oǵan salynǵan ınvestıtsııa kólemi - 8,2 mlrd. teńge. Jáne Atyraý oblysynda «Treıler óndirisi» jobasy júzege asyryldy. Óndiris kólemi 170 mln. teńgeni quraıtyn bul jobanyń aıasynda 30 jumys orny qurylyp otyr jáne onyń jyldyń qýaty 72 birlikti quraıtyn bolady. Atyraýda sondaı-aq «Qurylys jabdyqtarynyń óndirisi» jobasy da iske asyryldy.
Oǵan qosa, Batys Qazaqstan oblysynda «MAZ kóliginiń negizinde arnaıy avtotehnıkanyń birlesken óndirisin uıymdastyrý» jobasy (óndiris kólemi - 600 mln. teńge, 50 jumys orny), Qaraǵandy oblysynda «Mamandandyrylǵan ushaqtar óndirisin uıymdastyrý» jobasy (óndiris kólemi - 1,6 mlrd. teńge, 125 jumys orny, jyldyq qýaty - 35 ushaq) men «LAN lokaldyq júıesi úshin telekommýnıkatsııalyq kabelder óndirý» jobasy (óndiris kólemi - 793 mln. teńge, 60 jumys orny, jyldyń qýaty 18 myń shaqyrym) iske qosyldy.