Qazaqstanda mal urlyǵy jazasy qalaı kúsheıtildi
«Mal urlyǵy barlyq urlyqtardyń 3 paıyzyn qurasa da, qarapaıym halyqqa aıtarlyqtaı zııan keltiredi. Ádette mal urlyǵynyń kóp bóligi nemese 75 paıyzy erkin jaıylymda jasalady. Sońǵy 5 jylda mal urlyǵyn 62,5%-ǵa, 2023 jyly – 16,3%-ǵa tómendetýge qol jetkizdik. Bul jumys jalǵasýda», - dedi Jandos Batyrbekov QR ІІM aptalyq brıfınginde.
Maldyń saqtalýyn qamtamasyz etý úshin ІІM bastamasymen jergilikti atqarýshy organdar óńirlerdiń erekshelikterin eskere otyryp, mal jaıý qaǵıdalaryn ázirledi jáne bekitti, onda maldy esh baqylaýsyz jaıýǵa tyıym salynǵan.
QR Ákimshilik quqyqbuzýshylyqtar týraly kodeksiniń 408-baby boıynsha kórsetilgen erejelerdi buzǵany úshin ákimshilik jaýapkershilik belgilengen – 3-ten 10 AEK-ke deıin aıyppul qarastyrylǵan. Osylaısha ótken jyly 42 myńnan astam buzýshylyq anyqtaldy.
«Qazirgi ýaqytta mal urlaý jazasy Qylmystyq kodekste «Mal urlyǵy» degen jeke bapta kózdelgen, ondaǵy eń joǵary jaza – múlikti tárkilep, 12 jylǵa deıin bas bostandyǵynan aıyrý. Biliktilik belgisin aýyr qylmystar sanatyna aýystyrý arqyly birneshe ret mal urlaǵandarǵa, úı-jaıǵa basyp kirgenderge jaza qatańdatyldy. Bul jábirlenýshilermen tatýlasý arqyly urylardyń jazadan jaltaryp ketpeýine jáne urlyqtyń aldyn alýdy kúsheıtýge múmkindik berdi», - deıdi spıker.
Ótken jyly respýblıka aýmaǵynda «Mal urlyǵy» jedel-profılaktıkalyq is-sharasy 4 ret uıymdastyrylǵan, onyń ekeýi qysqy soǵym maýsymynda ótken. Atalǵan is sharalardy ótkizý kezinde mal urlyǵyna qatysy bar 450 adam, 75 qylmystyq top ustaldy. Urlanǵan 8,5 myńnan astam maldyń 4,5 myńy nemese 50% tabylyp, ıelerine qaıtaryldy.
Qylmystyq toptarmen kúresý úshin óńirlerde mal bazarlary, mal soıý oryndarynda reıd júrgizetin jedel-izdestirý toptary turaqty jumys isteıdi. Osy jumystar nátıjesinde 2023 jyly 376-dan astam mal urlyǵy ashylyp, 59 qylmystyq top ustalǵan.