Qazaqstanda lıftilerdi jańartýǵa 10 mlrd teńge bólindi – Beıbit Atamqulov

NUR-SULTAN. QazAqparat – Elimizde lıft sharýashylyǵyn jóndeý men aýystyrý úshin respýblıkalyq bıýdjetten 10 mlrd teńge bólindi. Bul týraly QR Indýstrııa jáne ınfraqurylymdyq damý mınıstri Beıbit Atamqulov aıtyp berdi, dep habarlaıdy QazAqparat tilshisi.

«Ótken jyly Lıft mamandary qaýymdastyǵymen birlesip, úlken jumys atqardyq. Jyl sońynda jeltoqsan aıynda azamattyq qorǵaý týraly zańǵa keıbir ózgeristerdi engize aldyq. Lıft boıynsha standart qabyldandy, olardy tekserýdiń normalary anyqtaldy, ákimdikter janyndaǵy ınspektor, áleýmettik ınfraqurylym nysandaryndaǵy óndiristik qaýipsizdikti qadaǵalaý jónindegi memlekettik ınspektor laýazymy engizildi. Lıftilerdiń jaǵdaıyn qatań baqylaýǵa múmkindik beretin normalar qabyldandy», - dedi spıker Ortalyq kommýnıkatsııalar qyzmetinde ótken brıfıngte.

Mınıstrdiń aıtýynsha, munda otandyq óndirýshilerdi qoldaýǵa aıryqsha mán beriledi. Qazirgi ýaqytta elimizde alty lıft óndirýshi jumys isteıdi.

«TKSh QazOrtalyǵymen» birlesip, Qaraǵandy qalasyndaǵy lıfterdi jańǵyrtý jumysyn bastadyq. Pılottyq joba aıasynda Qaraǵandy qalasy men Qaraǵandy oblysynda 200-ge jýyq lıft jóndeledi. Sonymen birge, lıft qunyn túsirý máselesin de talqylap jatyrmyz. Lıft mamandary qaýymdastyǵymen ónerkásiptik qaýipsizdik salasynda jumys isteýge sertıfıkattalǵan zańdy tulǵalarǵa qoıylatyn biliktilik talaptaryn bekittik», - dedi B. Atamqulov.