Qazaqstanda lańkestikke qatysty zańsyz kontent negizinen Facebook jáne Youtube jelileri arqyly taraıdy
Bul týraly búgin QR Bas prokýratýrasynda lańkestikke qarsy is-qımyldardy damytý boıynsha ótken xalyqaralyq konferentsııada QR Investıtsııa jáne damý mınıstrligi Baılanys, aqparattandyrý jáne aqparat komıtetiniń aqparattyq keńistikti baqylaý basqarmasynyń basshysy M.Komıssarov málim etti. «Búgingi tańda sarapshylardyń baǵalaýynsha, Qazaqstanda tanymal áleýmettik jelilerdiń kósh basynda reseılik VKontakte jelisi tur. Odan keıin tanymaldylyǵy jaǵynan Feısbýk, Tvıtter áleýmettik jelileri kele jatyr. Zańsyz kontenttiń anyqtalýy boıynsha qaraıtyn bolsaq, birinshi orynda Facebook, beınexostıngterde Youtube jelisi tur. Sebebi, onda kez kelgen adam, ózi qalaǵan materıaldy jarııalaı alady, sondyqtan da bolar, eń kóp zańsyz materıaldar osy jerlerden tabylyp jatady»,-deıdi ol. Komıssarovtyń sózine qaraǵanda, qazirgi ýaqytta áleýmettik jelilermen baılanys ornatylǵan jáne negizinen olar qazaqstandyq quqyqqorǵaýshydardyń ótinishterine oń sheshim shyǵaratyn kórinedi. «Osyndaı materıal anyqtalyp jatqanda, áleýmettik jelilerdi dereý xabarlandyramyz. Kóbinese áleýmettik jelilerdiń basshylyǵy bizge qulaq asady jáne máseleni sotqa jetkizbeı, oń sheshedi», - dep sózin túıindedi M. Komıssarov. Basqarma basshysynyń aıtýynsha, mundaı shekteýler negizinen qaýpti materıaldardan qalyń kópshiliktiń sanasyn ada ustaý úshin qajet. «Árıne, eger adam izdese, ony mindetti túrde tabady. Internettiń ereksheligin eskere otyryp, 100% zańsyz kontentti joıyp otyrý jáne aldyn alý múmkin emes nárse. Bizdiń jumysymyz jalpylama boldyrmaýdyń amaly», - dedi ol.