Qazaqstanda qysymy joǵary naýqastarǵa arnalǵan qaýipti preparattar alynyp tastaldy

ASTANA. QazAqparat - Qazaqstanda dárihanalardan quramynda valsartan atty belsendi zat bar «Vazar», «Nortıvan» ı «VazarN» dárilik preparattary satýdan alynyp tastaldy, dep habarlaıdy QazAqparat. 

Eske sala keteıik, aǵymdaǵy jyldyń tamyz aıynda QR Densaýlyq saqtaý mınıstrligi quramynda valsartany bar keıbir dárilerdi qoldanystan shyǵarý jóninde shara qoldandy.

Buǵan deıin halyqaralyq retteýshi uıymdar: Dári-dármekter jónindegi eýropalyq agenttik (EMA), Dári-dármekter jáne densaýlyq saqtaý sapasy boıynsha eýropalyq dırektorat (EDQM) jáne AQSh-tyń tamaq ónimderi men dári-dármekter sapasyn sanıtarlyq qadaǵalaý basqarmasy (FDA) quramynda valsartan belsendi zaty bar preparattardy naryqqa jibermeý jóninde shara qabyldaǵan bolatyn.

Qazaqstanda bul preparatty QR DSM «Dárilik zattardy, medıtsınalyq maqsattaǵy buıymdardy jáne medıtsına tehnıkasyn saraptaý ulttyq ortalyǵy» júrgizetin keshendi monırıngten keıin satýdan alyp tastaý jóninde sheshim qabyldandy.

Júrgizilgen jumystyń nátıjesinde Lınhaı provıntsııasynda (QHR) ornalasqan Chjetszıan Hýahaı Farmasıýtıkals Ko.Ltd» kompanııasy óndirgen belsendi sýbstantsııa valsartannyń quramynda onkologııalyq aýrýlardy týdyratyn N-nıtrozodımetılamın (NDMA) bar ekeni anyqtalǵan. Halyqaralyq retteýshi organdardyń keńesi boıynsha, Qazaqstanda joǵaryda atalǵan sýbstantsııasy bar preparattar naryqtan shyǵaryla bastady.

«Valsartan preparattary júrek-qantamyrlary júıesiniń kúrdeli dertterin emdeý úshin qoldanylǵan. Olardy qoldanýdy emdeıtin dárigerdiń ruqsatynsyz toqtatpaǵan jón», - dep atap ótti QR DSM Farmatsııa komıtetiniń tóraıymy Lıýdmıla Buırabekova.

Onyń aıtýynsha, bul preparattar jazylǵan patsıentter basqa dárige aýystyryp berý úshin tez arada dárigerge barýy kerek. Osylaısha, búginde Qazaqstannyń farmatsevtıkalyq naryǵynda balamaly dárilik zattar bar. Budan basqa, quramynda valsartannyń belsendi emes sýbstantsııasy bar dári-dármekter naryqta qalyp otyr jáne densaýlyq úshin qaýipsiz bolyp tabylady.

QR Dári-dármekteriniń memlekettik tiziliminen preparatǵa ruqsat etilgenin jáne shektelgenin tekserýge bolady. Ol úshin DZSUO (www.ndda.kz) saıtyna kirip, «Memlekettik tizilim» bóliminen qajet preparattyń ataýyn engizip, izdeýge bolady.