Qazaqstanda qylmystyq aıyppul deńgeıi tómendetilýi múmkin
Qazaqstannyń Bas prokýratýrasy qylmystyq aıyppuldardy taǵaıyndaýǵa qatysty zańnamalyq ózgerister paketin daıyndady. Bul jóninde búgin QR Bas prokýratýrasynda ótken arnaıy jıynda jarııa etildi.
"Birinshiden, qylmys úshin salynatyn aıyppuldardyń eń tómengi kólemin tómendetý qısyndy dep sanaımyz. Kez kelgen jaza qısynǵa saı bolýy tıis. Eske sala keteıin, Qylmystyq Kodeks boıynsha, 1997 jyly eń tómengi aıyppul 25 AEK bolatyn. Qazir ol 500 AEK-ke jetip otyr. Biz onyń kólemin 250 AEK-ke tómendetýdi usynamyz", - dedi Bas prokýrordyń orynbasary Marat Axmetjanov krımınologııalyq forým barysynda.
Onyń aıtýynsha, bundaı jańashyldyq birinshi ret jeńil urlyqqa barǵan azamattar úshin usynylyp otyr.
Atap aıtqanda, mundaı norma usaq urlyq, jymqyrý, jeńil alaıaqtyq, ózgeniń múlkin ıemdený jáne ózge de aýyr emes qylmystarǵa taralýy kerek, dep sanaıdy Axmetjanov.
"Ekonomıkalyq yqpaldastyq jáne damý uıymy memleketteriniń tájirıbesi boıynsha, 1000 AEK-ten tómen aıyppuldy tóleýge 1 jylǵa deıin, eger odan joǵary bolsa, 2 jylǵa deıin bólip tóleý múmkindigin qarastyrýǵa bolady", dedi spıker.
Bas prokýrordyń orynbasary atap ótkenindeı, qolda bar zańnama boıynsha, aıyppul bir aı ishinde tólenýi tıis, al bólip tóleý tek jarty jylǵa ruqsat etilgen. Bul, onyń oıynsha, kóp azamattar úshin múmkin emes.
"Búgingi aıyppuldar 1 mıllıon teńgeden bastalady jáne jarty mıllıard teńgege jetedi. Qazaqstanda ortasha aılyq 143 myń teńge ekenin eskersek, aıyppul óteýge keminde 7,5 aı ketedi, biraq ol úshin tamaq ishpeı, bala-shaǵany asyramaı barlyq qarajatty aıyppuldy óteýge jiberýge týra keledi", - dedi Marat Ahmetjanov.
"Keıbir adamdar aıyppuldardy taǵaıyndaý qoǵamnyń qaýipsizdigin tómendetedi dep oılaıdy. Biraq aıyppul arqyly qaýipti qylmyskerler men jaýyzdardy eshkim bosatqaly jatqan joq. Bul tek jeńil qylmysqa birinshi ret barǵan tulǵalarǵa ǵana qoldanylady", - dep atap ótti ol.