Qazaqstanda qylmys jasap, Brazılııada jasyrynyp júrgender bar ma

NUR-SULTAN. QazAqparat – QR Parlamenti Májilisiniń jalpy otyrysynda palata depýtattary «Qazaqstan men Brazılııa arasyndaǵy adamdardy ustap berý týraly shartty ratıfıkatsııalaý týraly» zań jobasyn maquldady, dep habarlaıdy QazAqparat tilshisi.

«Búgingi tańda Brazılııamen qylmystyq salada úsh negizgi shart jasaldy. Bul eki el arasyndaǵy ózara senimdikti bildiredi. Qazir eki eldiń arasyndaǵy baılanys joǵary deńgeıde. Saýda aınalymy 2019 jyly 13 paıyzǵa ósti. 2016 jyldan beri eki el arasynda vızasyz tártip qatynastary jasalǵan», - dep toqtaldy QR Bas prokýrorynyń orynbasary Marat Ahmetjanov.

Jalpy otyrysta talqylaýǵa usynylǵan shart izdeýde júrgen adamdardy qylmystyq jaýapqa tartý jáne sot úkimin oryndaý úshin ekstradıtsııalaý máselelerin sheshedi.

«Eger adam Qazaqstanda qylmys jasap, Brazılııada jasyrynyp júrse, ol qamaýǵa alynady jáne Qazaqstanǵa ustap beriledi. Dál osylaısha qylmysker elimizde jasyrynyp júrse, biz Brazııalııa tarapyna adamdy ekstradıtsııalaýǵa mindetti bolamyz. Qujatta ustap berý jáne odan bas tartý negizderi bekitilgen», - dedi ol.

M. Ahmetjanovtyń sózine qaraǵanda, búginde Brazılııada Qazaqstannyń quqyq qorǵaý organdarynan jasyrynyp júrgen adam joq. Sonymen qatar, Brazılııa organdary tarapy elimizde izdeý salǵan kúdiktiler tirkelmegen.

«Sharttyń negizgi bir maqsaty – aldyn alý. Bul qujat qylmys jasap, Brazılııada jasyrynyp júrgen adamdardy qaıtarý úshin qajet quqyqtyq tetik bolyp otyr. Búgingi tańda shetelmen osyndaı 21 eki jaqty shart bar. Jaqyn arada biz osyndaı sharttardy Argentınamen, Perý, Domınıkan, Kıpr, Malaızııa jáne Grekııamen bekitpekpiz», - dedi Marat Ahmetjanov.