Qazaqstanda qus ósirý salasyndaǵy ǵylymdy damytý kerek - Rýslan Sháripov

NUR-SULTAN. QazAqparat – Qazaqstannyń qus ósirýshileri osy salaǵa memlekettik qoldaý jasaýdy surap otyr, dep habarlaıdy QazAqparat tilshisi.

Qazaqstan qus ósirýshileri odaǵynyń prezıdenti Rýslan Sháripov memlekettik qoldaý jasalmasa, qus ósirý salasyn damytý qıynǵa túsetinin atap ótti.

«Bul baǵytta tek memlekettik qoldaý ǵana kerek. Birinshi kezekte qus ósirý salasyndaǵy ǵylymdy damytý kerek. Osy oraıda qus ósirý ınstıtýtyn jańǵyrtýdy talap etip otyrmyz», - dedi ol elordadaǵy ІH halyqaralyq qus ósirýshiler forýmy barysynda tilshiler saýalyna jaýap bere otyryp.

Budan buryn habarlanǵandaı, búgingi forýmda qus jeminiń qymbattaýyna baılanysty qus ósirýshiler qıyndyqqa tap bolyp otyrǵany aıtyldy.

«Qus jeminiń bir tonnasy 180-190 myń teńgege jetti. Qus eti men jumyrtqanyń ózindik qunynda 70 paıyzy jemniń baǵasyna qatysty bolady. Eger qus jemi arzan bolsa, onda bizdiń ónim de naryqqa tómen baǵamen shyǵady», - dedi R. Sháripov.