Qazaqstanda qus eti bir jylda 14% qymbattady

ASTANA. QazAqparat – Bıylǵy qańtar-sáýir aılarynda elimizde 40,7 myń tonna muzdatylǵan qus eti óndirildi, bul ótken jylmen salystyrǵanda 5,7%-ǵa az. Balǵyn nemese salqyndatylǵan 45,9 myń tonna qus eti óndirilgen, bul ótken jyldyń qańtar-sáýir aılaryna qaraǵanda 22,6%-ǵa kóp. Bul týraly QazAqparat energyprom.kz saıtyna silteme jasap habarlaıdy.

Eń kóp muzdatylǵan qus eti Almaty oblysynda baıqalady (jylyna 16,9 myń tonna). Jetekshi óńirlerdiń úshtigine Aqmola (7,9 myń tonna) jáne Abaı (4,4 myń tonna) oblystary da kirdi.

Balǵyn jáne salqyndatylǵan qus eti boıynsha Aqmola oblysy kósh bastap tur: 17,3 myń tonna, bul ótken jylmen salystyrǵanda 27,5%-ǵa artyq. Sondaı-aq sektordaǵy negizgi óndirýshi óńirler arasynda Shyǵys Qazaqstan (14,9 myń tonna) jáne Almaty (6,5 myń tonna) oblystary bar.

Bıylǵy jyldyń birinshi toqsanynyń qorytyndysy boıynsha, jergilikti kompanııalar ótken jylǵy 74%-ǵa qaraǵanda qus eti men qus etinen alynatyn azyq-túlik sýbónimderine suranysty (ishki naryqta ótkizý jáne eksport) 77,1%-ǵa qamtamasyz etti. Import úlesi tıisinshe 22,9% qurady. Import 5,3%-ǵa, 23,8 myń tonnaǵa deıin azaıǵan.

Sonymen birge, Qazaqstannan eksportqa 6,6 myń tonna ónim jóneltildi, bul bir jyl burynǵy kórsetkishten birden 2,6 ese kóp. Eksport úlesi qolda bar resýrstardyń 6,3%-yn kórsetken.

Birinshi toqsanda ishki naryqtaǵy satylym 97,4 myń tonnaǵa deıin 3,7%-ǵa ósti.

Oǵan qosa, mamyr aıynyń qorytyndysy boıynsha qus eti jyldyq qarqynmen 13,5%-ǵa ósken. Onyń ishinde taýyqtyń tós eti bir jylda 21,2%-ǵa, jambas eti – 20,9%-ǵa, tutas taýyq eti – 16,4%-ǵa, san eti – 8,9%-ǵa qymbattady.

Óńirlik bóliniste baǵanyń eń kóp qymbattaýy Pavlodar oblysynda (27,2%) tirkeldi. Sondaı-aq, Batys Qazaqstan (+26,3%) jáne Qostanaı (+22,5%) oblystarynda baǵa qymbattaǵan.

Baǵanyń eń tómen jyldyq ósýi Aqtóbe oblysynda (2,7%) baıqalady. Al Túrkistan oblysynda bir jylda qus etiniń 1,9%-ǵa arzandaýy tirkelgen.