Qazaqstanda qurylysqa jyl basynan beri 174,9 mlrd teńge jumsalǵan

ASTANA. QazAqparat - Qazaqstanda 2018 jyldyń qańtar-aqpan aralyǵynda qurylys jumystarynyń kólemi 174,9 mlrd teńgeni qurady. Bul kórsetkish 2017 jyldyń sáıkes merzimimen salystyrǵanda 4,5 protsentke az, dep habarlaıdy QazAqparat QR Ulttyq ekonomıka mnıstrliginiń baspasóz qyzmetine silteme jasap. 

Atalmysh merzimde jumystardyń basym bóligi ınjenerlik qurylǵylardy ornatý boıynsha atqaryldy, ıaǵnı bul baǵytqa 29,2 mlrd teńge jumsaldy. Turǵyn úı qurylysyna 23,2 mlrd, ónerkásip ǵımarattaryna 22,8 mlrd teńge, baılanys jáne kommýnıkatsııa salasyna 20,7 mlrd jáne taý-ken jáne qaıta óńdeý ónerkásibine 20,3 mlrd teńge jumsalǵan.

Qurylys-montajdaý jumystarynyń kólemi 10,1 protsentke azaıyp, 153,6 mlrd teńgeni qurady. Kúrdeli jáne aǵymdy jóndeý jumystarynyń kólemi aldyndaǵy jylmen salystyrǵanda 70 protsentke artty.

Qańtar-aqpan aılary aralyǵynda 5840 jańa ǵımarattyń qurylysy aıaqtaldy, sonyń ishinde 5489 turǵyn úı men 351 turǵyn úıge jatpaıtyn ǵımarattar bar. Naqtyraq aıtqanda 2 jalpyǵa bilim berý mekemesi men 12 mektepke deıingi bilim berý nysany salyndy.