Qazaqstanda qurylys materıaldaryn shyǵaratyn eki zaýyt jumys isteı bastady

ASTANA. QazAqparat – Bıylǵy alty aıda qurylys materıaldarynyń 66 paıyzy otandyq taýar óndirýshileriniń úlesine tıesili boldy. Bul týraly Ónerkásip jáne qurylys mınıstrliginen málim etti, dep habarlaıdy QazAqparat tilshisi.

Bıylǵy alty aıda qurylys materıaldarynyń 66 paıyzy otandyq taýar óndirýshileriniń úlesine tıesili boldy. Otandyq óndirýshiler ártúrli portlandtsement, taýarlyq beton, gıps, qurylys eritindileri, gıpsokarton syndy taýarlarmen ishki naryqtyń qajettigin jaýyp otyr

, - dep atap ótedi mınıstrlik agenttiktiń resmı saýalyna bergen jaýabynda.

Vedomstvo málimetinshe, bıyl qurylys materıaldaryn óndiretin eki joba iske qosyldy. Olar – elordadaǵy «Astana-Avto-Stroı» JShS-nyń asfaltbeton shyǵaratyn zaýyty jáne Mańǵystaý oblysyndaǵy «CEMENT BETON M» JShS-nyń temirbeton buıymdaryn shyǵaratyn zaýyty.

Aıta keterligi, statıstıka málimetterine sáıkes, osy jyldyń qańtar-shildesinde elimizdegi oryndalǵan qurylys jumystary men paıdalanýǵa berilgen jańa nysandardyń (turǵyn jáne turǵyn emes úı-jaılar, onyń ishinde jalpy bilim beretin mektepter, mektepke deıingi uıymdar, aýrýhanalar, ambýlatorlyq-emhanalyq uıymdar jáne basqalary) jalpy aýdany 9 710 854 sharshy metrdi qurady. Bul ótken jyldyń jeti aıymen salystyrǵanda 10,7 paıyzǵa kóp.

Munan bólek, osy jyldyń jeti aıynda turǵyn úı qurylysyna salynǵan ınvestıtsııa kólemi 1 505,6 mlrd teńge boldy. Bul 2022 jyldyń 7 aıymen salystyrǵanda 2,5 paıyzǵa joǵary.