Qazaqstanda qurylys qarqyny báseńdedi - mınıstr

ASTANA. QazAqparat - Aǵymdaǵy jyldyń qańtarynda qurylys sektorynyń qarqyny báseńsı tústi. Bul týraly búgin Úkimet otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Ónerkásip óndirisiniń ósýi qańtarda 1,9 paıyzǵa deıin baıaýlady. Sonymen qatar, sýsyn, plastmassa buıymdaryn óndirý, jeńil jáne hımııa ónerkásibi joǵyry ósimdi kórsetti. Esepti kezeńde ken óndirý ónerkásibiniń kólemi 6,8 paıyz artty. Ósý munaı óndirýdiń 5,3, tabıǵı gazdyń - 6,1 jáne tústi metaldar keniniń - 15,8 paıyzǵa ósýimen baılanysty»,- dedi T.Súleımenov.

Mınıstrdiń dereginshe, aýyl sharýashylyǵy turaqty ósý qarqynyn kórsetip otyr. Óndiris kólemi 3,5 paıyzǵa ulǵaıdy. Ósim mal sharýashylyǵyndaǵy óndiristiń 3,6 paıyz ósýi esebinen qamtamasyz etildi. Bul rette, ósimdik sharýashylyǵy kólemi ótken jyldyń deńgeıinde saqtaldy.

«Qurylys sektorynda tómendeý úrdisi baıqalady. Qurylys jumystarynyń kólemi 1,8 paıyzǵa qysqardy. Buǵan kóppáterli úıler men ónerkásip ǵımarattaryn, bilim berý obektilerin, munaı jáne gaz magıstraldy qubyr joldaryn salý boıynsha jumys kólemderiniń azaıýy áser etti», - dedi ol.

Sonymen qatar ol jalpy qyzmet kórsetý salasynyń shyǵarylymy 3,6 paıyzǵa ósip, kólik salasynda ósim 3,7 paıyz quraǵanyn aıtty.

«Aıtarlyqtaı ósim saýdada 7,5 paıyz deńgeıinde tirkeldi. Bul kóbinese gaz, munaı, munaı ónimderi, qara jáne tústi metall kenderi, jabdyqtar, azyq-túlik taýarlary, sýsyndar jáne taǵy da basqa taýarlar boıynsha bólshek saýdadaǵy, sol sııaqty kóterme saýdadaǵy taýar aınalymynyń ulǵaıýyna baılanysty», - dedi mınıstr.