Qazaqstanda qurylatyn Blogerler qaýymdastyǵyna kimder kiredi

NUR-SULTAN. QazAqparat – Qazaqstanda Blogerler qaýymdastyǵy qurylmaq. Bul týraly Nur-Sultan qalalyq Qazaqstan halqy Assambleıasy medıa ortalyǵynyń jetekshisi Ravıl Valeev aıtty, dep habarlaıdy QazAqparat tilshisi.

«Qalaı bolǵanda da áleýmettik jeli alańdary esep aıyrysý nemese bireýlerdi qýdalaý úshin paıdalanylmaýy tıis. Osyǵan oraı medıa ortalyǵymyzdyń otyrystarynyń birinde Blogerler qaýymdastyǵyn qurý ıdeıasy aıtyldy. Bul Assambleıanyń bedelin úzýge, etnomádenı birlestikterdiń qyzmetine nuqsan keltirýge baǵyttalǵan áleýmettik jelilerdegi teris pikirlerge reaktsııamyz boldy. Qazir uıymdastyrý máselelerin talqylap jatyrmyz. Blogerler qaýymdastyǵy jalpyulttyq dıalogtyń ámbebap modeline aınalýy tıis», - dedi Ravıl Valeev Nur-Sultan qalalyq Qazaqstan halqy Assambleıasynyń HH sessııasynda.

Onyń boljamynsha, qaýymdastyq quramyna depýtattar, QHA músheleri, sarapshylar men quqyq qorǵaýshylar, Azamattyq alstyń, qoǵamdyq keńesterdiń, úkimettik emes uıymdardyń, bıznes qaýymdastyqtardyń jáne óndiristik salanyń ókilderi kiredi.

Sonymen qatar ol QHA Qazaqstan halqynyń birligin buzýǵa baǵyttalǵan zańsyz jáne teris jarııalanymdardy anyqtaý úshin áleýmettik jelilerge monıtorıng júrgizetindigin basa aıtty.

«Keı jaǵdaıda «bizge Assambleıanyń qajeti qansha?» degen taqyrypta ashý-yzamen jazba qaldyrǵan avtorlarmen dostasyp ta úlgerdik. Kóp jaǵdaıda Assambleıanyń jumysy men etnomádenı birlestikterdiń túpki máni jaıynda jeńil-jelpi túsinigi bar ol adamdar popýlıstik urannyń jetegine ketip qalǵan», - dedi ol.