Qazaqstanda kýrsanttar týraly serıal túsirilimi bastaldy

Qorǵanys mınıstri Rýslan Jaqsylyqov Qurlyq áskerleriniń áskerı ınstıtýtynda bolyp, bolashaq ofıtserler týraly telehıkaıanyń túsirilim barysymen tanysty, dep habarlaıdy QazAqparat.

Mınıstrliktiń baspasóz qyzmetinen málim etkendeı, serıal Qazaqstannyń tuńǵysh Qorǵanys mınıstri, Halyq qaharmany, armııa generaly Saǵadat Nurmaǵambetovtiń 100 jyldyǵyna arnalǵan.

Bir apta buryn bastalǵan túsirilim eki aıǵa sozylady. Fılm 42 mınýttyq, 20 serııadan turady. Oqý ornynda Qorǵanys mınıstri R.Jaqsylyqov shyǵarmashylyq ujymmen kezdesti.

Telehıkaıanyń premerasy 2024 jyldyń basynda otandyq telearnada ótpek. Serıal Qazaqstan Respýblıkasy Qarýly kúshteri Ulttyq áskerı-patrıottyq ortalyǵynyń qoldaýymen túsirilip jatyr.

Kınokartınadaǵy qımyldar Qurlyq áskerleri áskerı ınstıtýtynyń qabyrǵasynda ótedi. Sıýjette kóbine ofıtser bolýdy armandaıtyn kýrsanttardy kóremiz. Áskerı adamdardyń ómirine arnalǵan kóptegen fılmder sııaqty munda da abyroı, paryz, jaýapkershilik sezimi jáne Otanǵa degen súıispenshilik sııaqty mańyzdy taqyryptar qozǵalady. Árıne mahabbat hıkaıalaryn da aınalyp ótpeıdi, - delingen vedomstvo málimetinde.

Bul ofıtser kadrlardy daıarlaıtyn áskerı oqý ornynyń kýrsanttary týraly elimizdegi alǵashqy serıal bolmaq.

Qorǵanys vedomstvosynyń basshysy dástúr boıynsha túsirilim tobymen birge tabaqsha syndyryp, tilegin bildirdi.

Armııa generaly S. Nurmaǵambetov atyndaǵy Qurlyq áskerleri áskerı ınstıtýtynyń 50 jyldan astam tarıhy bar. Áskerı ınstıtýt osy jyldar ishinde myńdaǵan ofıtser kadrlardy daıyndap shyǵardy. Onyń alǵashqy túlekteriniń qatarynda Halyq qaharmany general-leıtenant Baqytjan Ertaev bar. Qorǵanys mınıstri de osy áskerı oqý ornynyń túlegi ekenin aıta keteıik.