Qazaqstanda qursaqtaǵy balanyń omyrtqasyna da operatsııa jasalady - Serik Aqsholaqov

ASTANA. QazAqparat – Qazaqstanda qursaqtaǵy balanyń omyrtqasyn emdeıtin operatsııalar jasalýy múmkin. Búgin «Jibek Joly» telearnasynda «Suhbat. Láılá Sultanqyzymen» baǵdarlamasynda «Ulttyq neırohırýrgııa ortalyǵy» AQ basqarmasynyń tóraǵasy, bilikti neırohırýrg Serik Aqsholaqov aıtty, dep habarlaıdy QazAqparat tilshisi.

«Jaqynda bizge Florıdadan tanymal neırohırýrg (Samer Elbabaa) keldi. Osyǵan deıin onymen AQSh-ta tanysqan bolatynmyn. Ol professor jatyrdaǵy balaǵa, ıaǵnı omyrtqasy durys bitpegenderge (Spina Bifida aýrýy) neırohırýrgııalyq operatsııa jasaıdy. Mundaı operatsııany jasaıtyn álemde 3-4 memleket bar. Atalǵan neırohırýrg bul baǵytta biraz operatsııany ótkizdi», - dedi Serik Aqsholaqov.

Osy oraıda Ulttyq neırohırýrgııa ortalyǵynyń basshysy AQSh-tyń neırohırýrgteri Qazaqstandaǵy medıtsınalyq uıymdar jaıynda jaqsy biletinin atap ótti.

«Professor Qazaqstanǵa bir kúnge arnaıy kelip, bizdiń ortalyqtyń jumysymen egjeı-tegjeıli tanysty. AQSh ǵalymy baıandama jasaǵannan keıin, bizdiń jas mamandar ózderin qyzyqtyrǵan taqyryptar boıynsha jappaı suraqtaryn qoıdy. Atap aıtqanda, bizdiń ortalyqtaǵy jas hırýrgterdiń, qyzmetkerlerdiń 90 paıyzy aǵylshyn tilin erkin meńgergen. Ózderiniń ǵylymı jumystaryn sheteldegi forýmdarda tanystyryp, Ulttyq neırohırýrgııa ortalyǵynyń jetistikterin shetelde kórsetip tur. Osy oraıda shetel ǵalymy bizdiń jastardyń álemdik medıtsınadaǵy termınderdi, aǵylshyn tilin jaqsy meńgergenin kórip, tańdandy», - dedi S. Aqsholaqov.

Bul turǵyda ol bolashaqta atalǵan kúrdeli operatsııany Qazaqstanda ótkizý jospary bar ekenin málim etti.

«Osy sapar aıasynda onymen tıisti kelissóz júrgizip, atalǵan operatsııany elimizde jasaý josparyn kelistik. Bul dertti ýaqytyly emdemese, bala týǵanda sal aýrýyna shaldyǵady. Mundaı operatsııadan keıin balanyń paralıch bolmaýyna jaǵdaı jasalady», - dedi ǵalym.

Vıdeodan alynǵan kadr