Qazaqstanda kúnine qansha munaı óndiriledi

ASTANA. QazAqparat - 2019 jylǵy qańtarda Qazaqstan boıynsha 8 mln tonna munaı óndirildi. Táýligine ortasha óndirý deńgeıi 258,3 myń tonnany qurady, dep habarlaıdy QazAqparat.

«Aqpan aıynda aldyn ala derekter boıynsha Qazaqstan boıynsha munaı óndirý 7,23 mln tonnany qurady. Táýligine shamamen 259,3 myń tonna óndirildi. 2019 jyldyń 2 aıynda jalpy óndirý 15,2 mln tonnaǵa jetti. Osy oraıda ortasha táýliktik óndirý 257,6 myń tonnany nemese táýligine 1,880 mln barreldi qurady», - delingen QR Energetıka mınıstrliginiń Feısbýktegi paraqshasynda.

Atap aıtqanda, Qazaqstannyń OPEK + aldyndaǵy mindettemeleri ~1,860 mln barrel quraıtynyn eskere otyryp, onda táýligine tek qana 20 myń barrel aýytqý bar ekenin baıqaýǵa bolady. Bul óz kezeginde Qazaqstannyń OPEK+ aldynda óz mindettemelerin oryndaýǵa tyrysatynyn kórsetedi.

Eske sala keteıik, 2018 jyly elimizde 90 mln tonna munaı óndirildi. Al bıyl 89 mln tonna deńgeıinde óndirý josparlanýda.