Qazaqstanda quldyqqa satylǵan 90 adamnyń 75-i - áıelder

ASTANA. QazAqparat – Jyl saıyn Qazaqstan aýmaǵynda quldyqqa satylatyn 90 adamnyń 75-i - áıelder. ІІM uıymdasqan qylmysqa qarsy kúres departamenti basshysynyń orynbasary Shynar Kósherbaeva Májilis ǵımaratynda zań jobasyn talqylaý kezinde osyndaı derek keltirdi, dep habarlaıdy QazAqparat.

«Adam saýdasynyń genderlik sıpatyna toqtalsaq, bizde jynystyq qanaý faktileri basym. Jyl saıyn adam saýdasynyń 90 qurbany anyqtalatyn bolsa, sonyń 75-i áıelder. Májbúrli eńbekke tartylatyn er adamdardyń sany 10-ǵa deıin. Adam saýdasynyń qurbany bolǵan erlerdiń jasy 18-den 70-ke deıin. Praktıkalyq taldaýǵa súıensek, olardy eńbek quldyǵyna tartady. Áıelder arasynda kámeletke tolmaǵandy adam saýdasyna salý kezdesedi. Jasy 16,17-den bastalady. Jynystyq qanaýǵa túskenderdiń jasy 40-qa deıin barady. Al eńbek quldyǵyna tartylǵan áıelderdiń jasy - 50-ge deıin. Óıtkeni áıelderdi de úı sharýasyna kúshtep jegýi múmkin», - dedi ІІM ókili.

Onyń aıtýynsha, Qazaqstan aýmaǵynda quldyqqa satylatyndardyń basym bóligi - óz otandastarymyz.

«Qazaqstan aýmaǵynda Ortalyq Azııa memleketteriniń azamattary adam saýdasyna tartylady. Ózbekstan, Qyrǵyzstan azamattary kóp ushyraıdy. Reseı azamattaryn qanaý faktileri de boldy. Degenmen adam saýdasyna ushyraıtyndardyń 80 paıyzy - Qazaqstan azamattary. Bizde adam saýdasynyń ishki trafıgi kóbirek problemaly dep esepteledi», - dedi Shynar Kósherbaeva.