Qazaqstanda kúdiktini qamaýda ustaý merzimi qysqarmaq
Aıta keteıik, qazan aıynda Elbasynyń bastamasymen «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasy Parlamentke usynylǵan edi.
«Memleket basshysynyń tapsyrýymen qylmystyq protsesti jańǵyrtý boıynsha vedomstvoaralyq jumys toby quryldy. Prezıdent qylmystyq protseske qarapaıym turǵyndardyń kózimen qaraýdy tapsyrdy jáne adam quqyqtaryn qorǵaý deńgeıin kóterý, taraptardyń básekelestigin arttyrý, sot baqylaýyn keńeıtý, tergeý rásimderin jeńildetý jáne tergeý organdary, prokýratýra jáne sot arasyndaǵy ókilettikterin naqty bólý sekildi 5 negizgi baǵytty anyqtap berdi», - dep atap ótti Marat Ahmetjanov Rixos Borovoe qonaq úıinde ótken «Qazaqstandaǵy qylmystyq protsess: jańǵyrý joldary» atty halyqaralyq konferentsııada.
Atap aıtqanda, jańa zań jobasynda qamaýda ustaý merzimin 72 saǵattan 48 saǵatqa deıin qysqartý kózdelgen. Al kámelettik jasqa tolmaǵan tulǵalardy ustaý merzimi 24 saǵattan aspaýy tıis.
«48 saǵat álemdik standart bolyp sanalady. Al bizde adamdy ustaıdy jáne úsh kún boıy aıǵaq jınaıdy. Saraptaý nátıjesi boıynsha, dál osy kezeńde aıypty moıyndaǵan túsinikteme jazdyryp alý úshin ustalǵandarǵa kóbirek qysym jasalatynyn kórip otyrmyz. Muny retke keltirý qajet. Adam quqyqtary aldyńǵy orynda turýy tıis», - deıdi M.Ahmetjanov.
Sonymen birge, Bas prokýror orynbasarynyń aıtýynsha, kúdiktilerdi 72 saǵat ustaý merzimi asa aýyr jáne qaýipti ister úshin saqtalady.
«Terrorıstik jáne ekstremıstik qylmystar, jappaı tártipsizdikter, kámelettik jasqa tolmaǵandarǵa jynystyq kúsh kórsetý, adam óltirý jáne esirtki zattaryn zańsyz tasymaldaý syndy aýyr qylmystar boıynsha jáne kúdiktini jetkizý úshin joldyń uzaqtyǵy, qatynas kólikteriniń bolmaýy nemese tótenshe jaǵdaıdyń oryn alýy sekildi birqatar sebepterge baılanysty kúdiktini 72 saǵat ustaý merzimi saqtalady», - dep óz sózin túıindedi M.Ahmetjanov.