Qazaqstanda «QR Táýelsiz kásipodaqtarynyń konfederatsııasy» birlestigi quryldy
«Bul múldem jańa deńgeı, jańa múmkindikter. Kásipodaq uıymdarynyń ishki qurylymy ózgerdi. Eger buryn qarapaıym kásipodaqtardy ǵana biriktirip kelsek, endi óńirlik deńgeıdegi kásipodaqtardy biriktire alamyz. Jumys berýshiler endi bizben sanasatyn bolady. Biz ashyq ta shynaıy dıalog júrgizemiz. Biz tek zań aıasynda ǵana talaptar qoıa alamyz. Jumys berýshilermen qashanda kelisýge, ortaq til tabysýǵa beıimbiz. Jumysshy qaýymynyń zardap shekpegenin, zań aıasynda ózderine tıesili artyqshylyqtaryn alǵanyn qalaımyz. Olaı bolmasa, kásipodaq quryp keregi ne?», - dedi Qazaqstan Respýblıkasynyń táýelsiz kásipodaqtary konfederatsııasynyń prezıdenti Larısa Harkova.
Aıta ketelik, «QR Táýelsiz kásipodaqtarynyń konfederatsııasy» kásibı odaqtar qurý baǵytynda táýelsiz Qazaqstan tarıhynda tirkeý quqyǵyna ıe bolǵan ekinshi uıym.
Qazirgi tańda konfederatsııa quramynda alty salalyq kásiptik uıym bar. Solardyń tórteýi konfederatsııanyń quryltaıshylary bolyp belgilendi. Olar:
«Ádildik áleýmettik jáne úı jumyskerleri salalyq kásiptik odaǵy», «Densaýlyq saqtaý áleýmettik damý salalyq kásiptik odaǵy», «Otyn-energetıkalyq kesheni salalyq kásiptik odaǵy» jáne «Buqaralyq aqparat quraldary jáne telekommýnıkatsııa salalyq kásiptik odaǵy» qoǵamdyq uıymdary. Qalǵan eki kásiptik uıym bilim jáne shaǵyn jáne orta bızneske qatysty.
Larısa Harkovanyń aıtýynsha, konfederatsııa quramy bolashaqta basqa da salalyq kásiptik odaqtarmen tolyǵatyn bolady. Qazirgi tańda elimizde áli qaıta tirkeýden ótpegen 600-den astam kásiptik odaqtar bar.
«Bizdiń konfederatsııa qaramaǵynda ázirge 75 myńdaı jumysshy qamtylǵan. Al búkil Qazaqstan boıynsha kásiptik odaqtar jumyskerlerdiń 30 paıyzyn qamtıdy. Bolashaqta bul kórsetkish budan da kóp bolatynyna senimdimin», - dedi L. Harkova.