Qazaqstanda qosymsha órtke qarsy qyzmettiń 121 deposyn salý qajet

ASTANA. QazAqparat - Abaı oblysyndaǵy alapat órt tótenshe jaǵdaı salasyndaǵy birqatar júıeli problemalardy ashyq kórsetti. Senator Sergeı Ershov óziniń depýtattyq saýalynda osy máseleni jarııa etti, dep habarlaıdy QazAqparat tilshisi.

Depýtat jaǵdaıǵa egjeı-tegjeıli taldaý jasaý barysynda mańyzdy eki problema anyqtalǵanyn atap ótti. Birinshisi – tótenshe jaǵdaımen kúreste áleýetti kúshter men tıisti quraldardyń jetispeýi. Ekinshisi – tótenshe jaǵdaıdan qorǵaýdy qamtamasyz etýdegi júıeli tásildiń bolmaýy.

«Elimizde memlekettik órtke qarsy qyzmettiń 426 bólimshesi bar, áli qosymsha 121 depo salý qajet. Bizge usynylǵan málimetterge sáıkes, tipti 2030 jylǵa qaraı órt sóndirý bólimshelerin salý qajettigi tek 55 paıyzǵa ǵana oryndalady. Jalpy tehnıka sanynyń shamamen 20 paıyzvy ótken ǵasyrdyń 70-90-jyldarynan bastap paıdalanylyp keledi jáne jańartýdy talap etedi», - dep atap ótti senator Úkimet basshysy Álıhan Smaıylovtyń atyna joldaǵan saýalynda.

Depýtat problemalardy sheshýge qarjy bólinetinin, biraq esep-qısapqa qaraǵanda ıgerilmeıtinin atap ótti.

S. Ershov 2018 jyldyń jeltoqsanynda osy saladaǵy erekshe mekeme – kásibı áskerılendirilgen avarııalyq-qutqarý qyzmeti jekeshelenip ketkenin eske saldy. Osy sheshimniń nátıjesinde memleket asa kúrdeli avarııany jedel joıýdy qamtamasyz ete alatyn mamandandyrylǵan qyzmetten aıyrylyp qaldy. Tótenshe jaǵdaılar mınıstrliginiń aqparatyna qaraǵanda, Qazaqstan aýmaǵynda memlekettik emes órtke qarsy 331 qyzmet nysany bar. Bul elimizdegi órt sóndirý bólimsheleriniń jartysyna jýyǵy memlekettik emes degendi bildiredi.

Senator jekeshelengen kásiporyndar portfelin ártaraptandyrý, sondaı-aq tótenshe jaǵdaıdy joıý barysynda memlekettik emes uıymdardyń jaýapkershiligi jóninde normatıvtik-quqyqtyq retteýdi jetildirýdi usyndy.