Qazaqstanda qosymsha qun salyǵyna qatysty tártip ózgerdi
Qarjy mınıstrliginiń habarlaýynsha, ondaǵy negizgi ózgerister qosylǵan qun salyǵyn ońaılatylǵan qaıtarý kezinde táýekelderdi basqarý júıesin engizýge qatysty. Bul «sur» shemalardy qoldaný nátıjesinde qosylǵan qun salyǵynyń asyp ketýin qaıtarý múmkindigin joıady.
«Buǵan deıin, BAQ-ta qun salyǵynyń asyp ketýin qaıtarýdyń jańa qaǵıdalary bıznes-qoǵamdastyqpen talqylaýsyz qabyldanǵandyǵy jáne Salyq kodeksiniń normalaryna qaıshy keletini týraly aqparat jarııalanǵan bolatyn. Onda salyq tóleýshiler qun salyǵynyń asyp ketýin qaıtarýdyń ońaılatylǵan tártibi quqyǵynan aıyrylatyny atap ótilgen. Qarjy mınıstrligi jańa qaǵıdalar Salyq kodeksiniń 136 jáne 429-baptaryna sáıkes ázirlengenin jáne eksporttaýshylar men salyq tóleýshilerdiń basqa sanattaryna qun salyǵyn qaıtarý boıynsha bıýdjetpen ózara qarym-qatynastardy retteıtinin habarlaıdy. Ózgerister bıylǵy 14 sáýirden bastap kúshine endi», - delingen vedomstvonyń habarlamasynda.
Aktini ázirleý kezinde bıznes-qaýymdastyqtyń eskertýleri men usynystary eskerilgen. 2022 jylǵy 25 qańtar men 8 aqpan aralyǵynda buıryq jobasy jarııa talqylaý úshin legalacts.egov.kz saıtyna ornalastyryldy. Barlyq eskertýler men usynystarǵa negizdelgen jaýaptar da berildi. Tıisinshe, normatıvtik quqyqtyq aktilerge ózgerister engizýdiń barlyq rásimderi men merzimderi saqtalǵan.
«Jańa qaǵıdalarǵa sáıkes, endi tekserýler barysynda ózara baılanysty taraptar arqyly jetkizýshilermen ózara esep aıyrysýlarǵa taldaý júrgiziletin bolady, bul sur shemalardy qoldaný nátıjesinde paıda bolatyn qun salyǵynyń asyp ketýin qaıtarý múmkindigin joıady. Sondaı-aq tekserýlerdiń praktıkalyq tájirıbesine súıene otyryp, qaǵıdalarǵa mátindik tujyrymdardyń ornyna esepteýdiń matematıkalyq formýlalary engizildi. Formýlalar zańnama normalaryn qoldanýdyń birkelki praktıkasyn engizýge yqpal etedi jáne somany durys anyqtamaý qaýpin, tekserýshiniń sýbektıvti baǵasyn joıady», - dep jazylǵan mınıstrliktiń habarlamasynda.
Budan basqa, buryn qoldanysta bolǵan 15 teris ólshemshart 12-ge deıin qysqartyldy, adal óndirýshilerdi qoldaýǵa baǵyttalǵan qosymsha 12 oń ólshemshart engizildi. Ony esepteý tártibi de jetildirildi, eger buryn táýekel faktisi úshin teris ball berilse, jańa qaǵıdalar boıynsha balldar táýekel aýqymy boıynsha beriledi. Osylaısha, vedomstvo jańa qaǵıdalar oń salyq tarıhy bar adal óndirýshi kásiporyndardy yntalandyratynyna jáne bıznestiń barlyq qatysýshylaryna teń jaǵdaı jasaýǵa yqpal etetinine senimdi.