Qazaqstanda qorshaǵan ortaǵa keletin zııandy baǵalaýdyń jańa tásilderi engizildi

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev elimizde taıaýda ǵana qabyldanǵan jańa ekologııalyq kodekstiń negizgi basymdyqtaryn atady, dep habarlaıdy QazAqparat tilshisi.

«Birinshiden, «Lastaýshy tóleıdi jáne qalpyna keltiredi» qaǵıdatynyń negizinde lastanýdyń aldyn alý jáne baqylaý boıynsha sharalar, sondaı-aq qorshaǵan ortaǵa keltirilgen zııannyń ornyn toltyrý úshin jaýapkershilik kózdelgen. Ekologııalyq zııan oryn alǵan jaǵdaıda tabıǵat paıdalanýshy qorshaǵan ortany bastapqy qalpyna keltirýge mindetti», - dedi Maǵzum Myrzaǵalıev OKQ-da ótken baspasóz máslıhatynda.

Mınıstrdiń ekinshiden, atmosferalyq aýanyń, sýdyń, topyraqtyń lastaný problemasyn sheshý úshin ónerkásipte eń ozyq qoljetimdi tehnologııalardy engizý kózdelgenin málim etti. Bul rette birinshi kezeńde jalpy lastanýdyń 80% shyǵaryndylarynyń kózi bolyp tabylatyn 50 iri kásipornyna engizý josparlanǵan.

«Eýropada 15 jyl ishinde eń ozyq qol jetimdi tehnologııalardyń arqasynda zııandy shyǵaryndylar 94%-ǵa azaıtyldy. Osy tehnologııalardy engizgen kásiporyndar emıssııa úshin tólemnen bosatylady. Eger kásiporyndar qol jetimdi tehnologııalardy paıdalanbasa, olardyń emıssııa úshin tólem mólsherlemeleri edáýir artady», - dedi ol.

Maǵzum Myrzaǵalıev sonymen qatar qorshaǵan ortaǵa áserdi baǵalaýdyń jańa tásilderi (QOÁB) engizilgenin jetkizdi.

«Atap aıtqanda biz qorshaǵan ortaǵa áserdi baǵalaýdan ótýdiń ádisterin jeńildettik. Búgingi kúni tabıǵat paıdalanýshylardyń bári (shamamen 20 myń) QOÁB-tan rásiminen ótýde. Jańa ekokodekske sáıkes qorshaǵan ortaǵa áserdi baǵalaýdyń mindetti protsedýrasynan tek birinshi sanattaǵy iri kásiporyndar ótedi. Bul shamamen 2600 kásiporyn. Osylaısha shynymen ekologııalyq qaýipti obektilerge basa nazar aýdarylady. Sonymen qatar, qoǵam ókilderi qorshaǵan ortaǵa áserdi baǵalaýdyń barlyq kezeńderine qatysady. Al ekinshi sanattaǵy obektiler skrınıngten ótedi. ıAǵnı, qorshaǵan ortaǵa áserdi baǵalaýdy júrgizý qajet nemese qajet emes ekendigi anyqtalady. Úshinshi sanattaǵy obektiler habarlamalyq negizde jumys isteıdi. Osylaısha ákimdikter úshinshi sanattaǵy obektilerden shyǵaryndylardyń, tógindilerdiń sany, jınaqtalatyn jáne beriletin qaldyqtardyń kólemi kórsetiletin deklaratsııalar qabyldaıtyn bolady. Tórtinshi sanattaǵy obektiler retteýden tolyq bosatylady», - dedi ol.