Qazaqstanda koronavırýstyń qandaı shtamdary tirkeldi

NUR-SULTAN. QazAqparat – Qazaqstanda vırýstardy genetıkalyq zertteý júrgizilip jatyr. Bul týraly Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Mınıstrlik vırýstyń elge kirgen jaǵdaıy men mýtatsııalyq ózgerýine monıtorıngti qamtamasyz etý úshin turaqty túrde vırýstardy genetıkalyq zertteý júrgizilip jatyr», - dedi Alekseı Tsoı Májilistegi Úkimet saǵatynda.

Onyń aıtýysha, 2020-2021 jyldary 1407 synama zertteldi. Osynyń nátıjesinde naýryzda «brıtandyq» Alpha shtamm, «ońtústikafrıkalyq» Beta shtamm, maýsymda «úndilik» Delta shtamm, tamyzda «nıgerııalyq» Eta shtamm anyqtaldy.

«SARS-CoV-2 vırýsynyń túrli nusqalarynyń taralýyn anyqtaý men monıtorıngileý jumystary jalǵasyp jatyr», - dedi mınıstr.

Aıta keteıik, Alekseı Tsoı Qazaqstanda KVI juqtyrý qarqyny boıynsha tórt tolqyny ótkenin málim etti.