Qazaqstanda koronavırýsty anyqtaıtyn dıagnostıkalyq júıe jasaldy

NUR-SULTAN. QazAqparat - Ulttyq bıotehnologııa ortalyǵy koronavırýs boıynsha ekspress dıagnostıkalyq júıesin jasady. Bul týraly «Qazaqstan ǵylymyn damytýdyń ózekti máseleleri» sektsııasynda Ulttyq bıotehnologııa ortalyǵynyń bas dırektory Erlan Ramanqulov aıtty, dep habarlaıdy QazAqparat tilshisi.

«Koronavırýs sııaqty jańa ınfektsııa paıda bolǵan kezdegi basty problema - satylatyn dıagnostıkalyq júıeniń joq bolýy. Ulttyq bıotehnologııa ortalyǵynda QR Bilim jáne ǵylym mınıstrligi dıagnostıka jasaý baǵytynda zertteý jumystaryn júrgizedi. Biz bir apta ishinde dıagnostıkalyq test-júıesin jasadyq. QR Densaýlyq saqtaý mınıstrliginiń basshylyq etýimen koronavırýsty ınfektsııa bolýy múmkin degen naýqastardan synama alyp, dıagnostıka jasaýdamyz», - deıdi Erlan Ramanqulov.

Ol dıagnostıka jasaý úshin bir kún ketetinin aıtty.

«Dıagnostıka qorytyndysyn jarııalaýǵa quqyǵym joq. Jalpy elimizde aýrý belgileri barlar ótken aptada paıda boldy. DDSU koronavırýs ınfektsııasy týraly aqparatty shamamen on kún buryn taratty. Biz másele nege qatysty ekenin túsinip, dıagnostıka jasaıtyn júıeni jasaýmen aınalysa bastaǵanymyzǵa bir jarym apta boldy. Biz jyldam jumys istedik. Bul Qazaqstanda da ǵylym bar ekenin jáne ol naqty nátıje kórsetetinin bildiredi», - dedi ol.

Ortalyq dırektory dıagnostıka jasaıtyn júıeniń eksperımentti nusqasyn jasaǵandaryn aıtty.

«Dıagnostıka jasaıtyn júıeni jasaýdy QR Bilim jáne ǵylym mınıstrligi qarjylandyrdy. Dıagnostıka jasaıtyn júıe jasaldy jáne oǵan Almatydaǵy Ortalyq refenens-zerthanada saraptama jasalyp jatyr. Eger adamǵa tán ınfektsııa ekeni anyqtalsa - munymen QR Densaýlyq saqtaý mınıstrligi jumys isteıdi. Nátıjesi qalaı bolǵany týraly da tek sol mınıstrlik aıta alady», - dedi ortalyq dırektory.