Qazaqstanda koronavırýske qarsy vaktsınanyń qansha dozasy bar

NUR-SULTAN. QazAqparat – Sanıtarlyq-epıdemıologııalyq baqylaý komıtetiniń basshysy Aıjan Esmaǵambetova vaktsınatsııadan keıin vırýs juqtyrǵan naýqastardyń qandaı ekpe túrin alǵanyn aıtty, dep habarlaıdy QazAqparat tilshisi.

«Búgingi tańda vaktsına alǵannan keıin koonavırýspen aýyrýdyń 4 765 jaǵdaıy tirkelip otyr. Birinshi kezeńnen keıin 2 384 jaǵdaı, ekinshi kezeńnen keıin 2381 jaǵdaı bolǵan. Bul jalpy vaktsına alǵandardyń 0,09 paıyzy ǵana. «Spýtnık V» vaktsınasynyń birinshi komponentimen 2048, ekinshi komponentimen 2 101 jaǵdaı (0,09 paıyz), Hayat-Vax – 246 jáne 221 (0,09 paıyz), CoronaVac - 45 jáne 11, QazVac – 41 jáne 45 jaǵdaı tirkeldi», - dedi komıtet basshysy ortalyq kommýnıkatsılar qyzmetinde ótken brıfıngide.

Aıjan Esmaǵambetova qaı óńirde qandaı vaktsına túrleri qalǵany týraly da málimet usyndy.

«Búginde 582 141 birinshi komponenttiń dozasy, 1 mln 194 myń ekinshi komponent dozasy bar. CoronaVac vaktsınasynyń 20 myń birinshi komponent dozasy bar. Barlyq óńirlerde ár túrli mólsherde bar. Eń kóbi Mańǵystaý oblysynda. Tek Shyǵys Qazaqstan jáne Aqtóbe oblystarynda joq. «Spýtnık V» ekpesiniń 581 myń birinshi komponent dozasy barlyq óńirlerde bar. QazVac-tyń 3000 dozasy bar. Mańǵystaý jáne Atyraý oblystarynda kóp. Almaty, Jambyl, Qaraǵandy jáne Túrkistan oblystarynda bul vaktsına qalǵan joq. «Sınofarmnyń» 6 286 birinshi komponent dozasy qaldy. Bul vaktsınanyń bári tek Mańǵystaý oblysynda», - dedi Sanıtarlyq-epıdemıologııalyq baqylaý komıtetiniń basshysy.