Qazaqstanda koronavırýsqa qarsy qandaı vaktsınalar bar

NUR-SULTAN. QazAqparat – QR Densaýlyq saqtaý mınıstrligi ınfektsııalyq aýrýlardy epıdemologııalyq baqylaý basqarmasynyń basshysy Roza Qojapova koronavırýsqa qarsy qandaı vaktsınalar qoljetimdi ekenin aıtty, dep habarlaıdy QazAqparat tilshisi.

«Qazirgi ýaqytta respýblıka boıynsha vaktsınalaý jáne revaktsınalaý jumysy jalǵasyp jatyr. Qazaqstanda vaktsınanyń úsh túri qoljetimdi, olar – QazVac, Sinopharm jáne Pfizer. Revaktsınalaý úshin – QazVac jáne Sinopharm bar», - dedi R. Qojapova ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, ekpe egý pýnktilerinde 1 mln 600 myń vaktsına dozasy bar.

«Búgingi tańda koronavırýs ınfektsııasyna qarsy vaktsınamen eresek turǵyndardyń 80%-dan astamy nemese barlyq halyqtyń 56%-dan astamy qamtylǵan. Respýblıka boıynsha koronavırýs ınfektsııasyna qarsy bastapqy revaktsınalaýmen qamtý tıisti halyqtyń 68%-dan astamyn (4,9 mln adam) qurady. Orta eseppen táýligine 10 myńnan astam adam ekpe saldyrady», - dedi Roza Qojapova.

Basqarma basshysy mamyr aıynyń sońynan bastap elde revaktsınalaý engizilgenin eske saldy. Búginde tıisti halyqtyń 55%-y revaktsına jasatqan.

Aıta keteıik, koronavırýs boıynsha jedel járdemdi eń kóp shaqyrý Qaraǵandy oblysynda jáne Nur-Sultan, Almaty qalalarynda tirkelgen.