Qazaqstanda koronavırýsqa qarsy dári-dármektiń 3 aılyq qory bar

NUR-SULTAN. QazAqparat – QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev «Atameken-business» arnasynyń efırinde koronavırýsqa qarsy dári-dármektiń tapshylyǵy joq ekenin málim etti, dep habarlaıdy QazAqparat tilshisi.

«Búginde bizde koronavırýs ınfektsııasyna qarsy dári-dármektiń 3 aılyq qory qamtamasyz etilgen. Onyń bári arnaıy habtarda saqtaýly. Sonymen qatar, Medıtsınalyq jáne farmatsevtıkalyq baqylaý komıtetiniń qyzmetkerleri dári-dármek tapshylyǵynyń aldyn alý baǵytynda túsindirý, nasıhattaý jumystaryn júrgizip jatyr. Dári-dármekti qymbattatpaý boıynsha da jumys júrgizilip jatyr. Kez kelgen dárihanada baǵa sebepsiz kóterilgen bolsa, osy komıtettiń jergilikti departamentterine habarlasýǵa bolady», - dedikomıtettiń resmı ókili.

Al Medıtsınalyq jáne farmatsevtıkalyq baqylaý komıtetiniń bólim basshysy Ásııa Moldınovanyń aıtýynsha, koronavırýsqa jáne kúndelikti paıdalanatyn dáriniń qoryn qalyptastyrý úshin 5 mlrd teńgeden astam qarajat jumsalǵan.

«Qazirgi tańda Qazaqstannyń 8 aımaǵynda turaqtandyrylǵan qor jınalǵan. 5 mlrd teńgeden astam qarjyǵa koronavırýsty emdeýge jáne kúndelikti tutynýǵa qajet dárilik zattardyń qory alynǵan. Al qalǵan 9 óńirde kóterme saýdamen aınalysatyn dárihana qoımalarynda dárilerdiń jalpy qory bar. Qazirgi tańda ol dárilik zattar jetkiliksiz dep aıta almaımyz. «Stels-omıkron sııaqty mýtatsııalyq shtamdar elimizge kelgenniń ózinde qajetti dárimen qamtamasyz etemiz», - dedi Ásııa Moldınova.

Buǵan deıin QR Densaýlyq saqtaý mınıstri Ajar Ǵınııat Qazaqstan boınysha maýsym aıyna deıin dári tapshylyǵy bolmaıtynyn málim etken bolatyn.