Qazaqstanda koronavırýsqa qarsy dári-dármektiń 2 aılyq qory bar

NUR-SULTAN. QazAqparat – QR Densaýlyq saqtaý mınıstri Ajar Ǵınııat koronavırýsqa qarsy dári-dármekpen qamtý sharalary qalaı uıymdastyrylyp jatqanyn aıtty, dep habarlaıdy QazAqparat tilshisi.

«KVI-men aýyrǵan naýqastardy emdeý úshin dári-dármektiń jáne medıtsınalyq maqsattaǵy buıymdardyń kólemi jetkilikti. Óńirlerde koronavırýs ınfektsııasyn emdeý úshin dárilik zattardyń 16 ataýy boıynsha 2 aılyq qor qamtamasyz etildi.

Alǵashqy medıtsınalyq-sanıtarııalyq kómek kórsetý uıymdarynda jalpy somasy 1,3 mlrd teńgeden artyq dárilik zattardyń qory bar», - dedi mınıstr Ortalyq kommýnıkatsııalar qyzmetinde ótken brıfıngide.

Sonymen qatar, mınıstrlik bólshek jáne kóterme saýda oryndarda dárilik zattardyń bolýyna turaqty monıtorıng júrgizip otyrǵany aıtyldy.

«Búgingi tańda saýda oryndarynda qolda bar dárilik zattardyń qory 2-3 aıǵa jetkilikti jáne qajet bolǵan jaǵdaıda ýaqtyly toltyrylady.

Budan basqa, osy jyldyń basynan bastap medıtsınalyq uıymdarǵa 6 mlrd teńgege dárilik zattar ákelindi.Bul jyldyq kólemniń 70%-yn quraıdy», - dedi Ajar Ǵınııat.

Dúnıejúzilik densaýlyq saqtaý uıymynyń málimetinshe ótken aptada 6,5 mln astam adam koronavırýs juqtyryp, dertten 14 myń adam kóz jumǵan.