Qazaqstanda kórnekti tatar aqynyna eskertkish qoıyldy

ASTANA. QazAqparat - Ataqty tatar aqyny, túbi bir túrkiniń maqtanyshy - Ǵabdolla Toqaıǵa arnap Semeı qalasynda eskertkish ornatyldy. Bul týraly Túrki akademııasynyń baspasóz qyzmeti habarlady.

Bul shara Qazaqstan Respýblıkasynyń Táýelsizdigine 25 jyl tolýy men aqynnyń bıylǵy 130 jyldyq mereıtoıyna oraılastyrylyp otyr.

Eskertkishtiń ashylý saltanatyna Semeı qalasynyń ákimi E.Salımov, Reseı Federatsııasynyń Qazaqstandaǵy bas konsýly S.Annenkov, sondaı-aq Búkilálemdik tatarlar kongresiniń jetekshileri men zııaly qaýym ókilderi qatysty.

Aıta ketý kerek, Túrki akademııasy halyqaralyq uıymy (TWESCO) nebári 26 jyl ómir súrip, qundy mura qaldyrǵan, ádebı tatar tiliniń negizin qalaýshy aqynnyń mereıtoıyna arnap birqatar sharalar uıymdastyrdy. Atap aıtqanda, TWESCO men Tatarstan Respýblıkasy Ǵylym akademııasy birlesip, 25 sáýirde Qazan qalasynda «Ǵabdolla Toqaı jáne Túrki dúnıesi» atty halyqaralyq konferentsııa ótkizdi. Sonymen qatar, aqynnyń shyǵarmashylyǵyna arnalǵan 2 kitapty: qazaq jáne tatar tilderindegi «Ǵabdolla Toqaı. Óleńderi» jáne «Tuǵyrly tulǵalar» serııasymen shyqqan «Ǵabdolla Toqaı taǵylymy» atty maqalalar jınaǵyn jarııalap basqan bolatyn.