Qazaqstanda kópbalaly analarǵa jylyna 6 myń páter bólinedi

NUR-SULTAN. QazAqparat - Qazaqstanda kópbalalay analar úshin jylyna 6 myń páter bólinip otyrady, dep habarlaıdy QazAqparat QR Indýstrııa jáne ınfraqurylymdyq damý mnıstrligine silteme jasap.

«2019 jylǵy bıýdjetti alǵashqy ret naqtylaý aıasynda Memleket basyshysynyń Nur Otan partııasynyń XVІІІ sezinde tapsyrǵan máselelerin júzege asyrýǵa jáne kópbalaly analar úshin arendalyq baspana salý men satyp alý úshin óńirlerge 50 mlrd teńge bólindi. Jalpy alǵanda, osy maqsatqa aldaǵy 7 jylǵa 350 mlrd teńge qarastyrylyp otyr. Bul jylyna 6 myń kópbalaly anany baspanamen qamtýǵa jetkilikti. 7 jylda beriletin páterler sany 40 myńǵa jetedi»,-delingen habarlamada.

Sondaı-aq vedomstvo ókilderiniń habarlaýynsha, Memleket basshysynyń tapsyrmasyn oryndaý jumystarynyń aıasynda Nur-Sultan, Almaty, Shymkent qalalaryndaǵy jumyssyz júrgen jastarǵa qajetti jaldamaly páter qurylysyna 2019 jylǵa 7,2 mlrd teńge qaralǵan.

«Áleýmettik jaǵdaıy tómen turǵyndarǵa arnalǵan jaldamaly turǵyn úı salýǵa bólingen 35 mlrd teńgeniń 2,2 mlrd teńgesi qaıta joldandy. Qosymsha respýblıkalyq bıýdjetten 5 mlrd teńge bólinetin boldy. Osylaısha, aldaǵy 3 jylda jas mamandarǵa arnalǵan 3 myń baspananyń qurylysyna 21,6 mlrd teńge qarastyrylyp otyr»,-dep naqtylady mınıstrlik ókilderi.

Mınıstrlik ókilderiniń habarlaýynsha, «Nurly jer» baǵdarlamasynyń aıasynda jylyna 12,16 mln sharshy metr baspana salý josparlanyp otyr. Sonyń nátıjesinde 650 myń otbasy nemese 2 mln adam baspanaly bolady.