Qazaqstanda kommýnaldyq tólemder tarıfterin ózgertý usynyldy

ASTANA. QazAqparat - QR Ulttyq ekonomıka mınıstrligi bıyl mamyr aıynda Parlament Májilisine «Tabıǵı monopolııalar týraly» zań jobasyn talqylaýǵa engizýdi josparlap otyr, dep habarlaıdy QazAqparat.

Zań jobasy retteýdiń jańa ádisterin engizý arqyly turǵyn úı-kommýnaldyq sharýashylyq salasyndaǵy tabıǵı monopolııalar sýbektileriniń tarıfterin qurýdyń jańa sheshimderin engizýdi kózdeıdi.

«Zań jobasy arqyly biz kásiporyndardyń shyǵyndaryn únemdeýge jáne tıimdilikterin arttyrýǵa yntalandyratyn bolamyz», - dep atap ótti Ulttyq ekonomıka vıtse-mınıstri Aıbatyr Jumaǵulov Parlamentte ótken dóńgelek ústelde.

Onyń sózinshe, 1998 jyly qabyldanǵan qoldanystaǵy zańnamada kásiporyndardyń tıimdiligin arttyrýǵa yntalandyratyn tetikter joq. Bul óz kezeginde jyl saıyn tarıfterdiń kóterilýine soqtyryp keledi. Sonymen qatar zań júıeli emes, sońǵy 3 jylda oǵan 200 túzetý engizilgen. Al tarıf qurý protsesi ashyq emes.

Mınıstrliktiń habarlaǵanyndaı, tarıf qunyna jelilerdiń tozýy áser etýde. «Nurly jol» baǵdarlamasy boıynsha, sý, káriz jáne jylý jelilerin jańartýǵa qarajat bólinedi.

2015 jyly osy maqsattarǵa 60 mlrd teńge bólinip, nátıjesinde jalpy uzyndyǵy 226,5 shaqyrym qubyr jańartyldy. 2016 jyly 86 mlrd teńgege 1733 shaqyrym jeli aýystyryldy. 2017 jyly bul maqsattarǵa 48 mlrd teńge qarastyrylyp otyr jáne 1190 shaqyrym qubyr jóndeledi dep josparlanǵan.

2020 jylǵa deıin tozyǵy jetken sý, káriz jáne jylý jelileriniń úlesin 67 protsentten, 53 protsentke tómendetý mejelengen.