Qazaqstanda kommýnaldyq qyzmetter aldyndaǵy bereshek 13 mlrd teńgege jetti
«Ótken jylytý maýsymynda óńirlerde jeke jáne zańdy tulǵalardyń kommýnaldyq qyzmetter aldyndaǵy debıtorlyq bereshegi 13 mlrd teńgeni qurady. Bul ótken jyldyń tıisti kezeńimen salystyrǵanda 780 mln teńgege kóp. 2019 jyly bul soma 12 286 mln teńge edi», - degen Indýstrııa jáne ınfraqurylymdyq damý mınıstir Beıbit Atamqulov Úkimet otyrysynda bereshegi eń kóp óńirlerdi atady.
Onyń aıtýynsha bul baǵytta Almatyda 2 mlrd 177 mln teńge, Nur-Sultanda 1 mlrd 928 mln teńge, Shymkent qalasynda 1 mlrd 924 mln teńge, Mańǵystaý oblysynda 1 mlrd 525 mln teńge qaryz bar.
«Ákimdikter boryshkerlermen debıtorlyq bereshekti óteý jáne azaıtý boıynsha júıeli sharalar júrgizip jatyr. Naqtyraq aıtqanda kassalyq qyzmet kórsetýdi jaqsartý, tutynýshylardyń bereshegi týraly shot-habarlamalardy taratý, eskertý habarlamalaryn taratý, kireberisterde habarlandyrýlardy ilý, materıaldardy sot organdaryna joldaý jumystary atqarylýda», - dedi Beıbit Atamqulov.