Qazaqstanda kommýnaldyq qyzmet kórsetý salasynda deldaldar joq

NUR-SULTAN. QazAqparat – Qazaqstanda kommýnaldyq qyzmet túrlerin kórsetý salasynda deldaldar jumys isteı me? Bul suraqqa QR UEM Tabıǵı monopolııalardy retteý komıtetiniń tóraǵasy Asan Darbaev jaýap berdi, dep habarlaıdy QazAqparat tilshisi.

«Jalpy qyzmetti usynatyn árbir toptyń óz mindettemesi bar. Máselen biz jylýmen qamtý týraly aıtar bolsaq, bul rette qyzmettiń úsh túri – óndiris, kólikpen jetkizý, qamtý sharýalary týraly sóz qozǵaımyz. Bul júıede qandaı da bir deldal joq», - dedi Asan Darbaev OKQ-da ótken baspasóz máslıhatynda.

Onyń aıtýynsha sýmen qamtý júıesi de osyǵan uqsas.

«Sýmen qamtý jáne tasymaldaý sharýasyn bir zańdy tulǵa atqarady. Monopolııaoyq salanyń ózi jetkizýshiniń bireý ekenin kórsetedi. Elektr energııasyna keler bolsaq, bul baǵytta da óndirýshiler, tasymaldap jetkizýshi ulttyq operator bar. Jalpy bul salaǵa salalyq mınıstrlik, ıaǵnı Energetıka mınıstrligi jaýap beredi. Mınıstrlik atalǵan uıymdardyń jumysyna turaqty túrde taldaý júrgizedi», - dedi Asan Darbaev.